Een vun de bekanntsten „Rieksbörger“-Verenigen snackt över sik sülvst vun ‚Königriek Düütschland‘. Un düsse Verenigen, de hett dat Bunnsbinnenministerium nu verbaden. De Polizei dörsöcht deswegen nu ok siet hüüt fröh mehre Wahnen in söven Bunnslänner. Hamborg höört hier nich to. Vör allen Dingen geiht dat üm en Gemeen in Sassen, wo se vundaag ok al Peter Fitzek fastnahmen hebbt. Dat is de, de bi de Verenigen ganz bavenan stahn deit un de sik ok sülvst to’n König maakt harr.
Dat geiht üm den Koalitschoonsverdrag twüschen SPD un de Grönen: Liekers dat dat den een oder annern richtigen Punkt geven deit, vermisst de Hannelskamer Hamborg alltohoop aver en Opbruchstimmen. Un bavento verlangt se, nu iesern de Bürokratie aftoboen un Saken gauer to genehmigen. Wat Olympia angahn deit, finnt de Hannelskamer dat aver goot, wenn een sik hier nochmal wedder bewarven deit. Tokamen Week will denn Börgermeester Peter Tschentscher en Regerensverkloren afgeven.
De Hamborger Polizei wohrschaut vör Inbrekers, de Salpetersüür bruken doot. So as dat heet, hebbt unbekannte Lüüd in’e verleden Weken ümmer wedder Döörslötter mit dat hochsüern Nattkraams tweimaakt un sik so denn Togang to de Wahnstuven verschafft. Deswegen wiest de Polizei dor nu op hen: Wokeen meent, dat ünner sien Döörslott wat Natts aflopen is oder sik dor wat verfarvt hett, de schull Bescheed seggen un dat mellen. Bavento schull man de Resten nich anfaten, denn dor kunn een böös wat bi to Schaden kamen.
Bet Middernacht schull Russland sik dorto ütern: Dat geiht üm de dörtig Daag, wo de Wapen twüschen jüm un de Ukrain swiegen schullen. Man dat Ultimatum vun de EU is aflopen un Russland hett nix seggt. Un nu kunnen ne’e Sankschonen op dat Land op tokamen vör allen Dingen gegen de sonöömte Schaddenflott, mit de Russland Öl verköpen deit. Besluten kunnen de Liddmaten vun’e EU de Sankschonen al vundaag. Man dat geiht blots, wenn ok all de sövenuntwintig Staten een Menen sünd.
De mehrsten Lüüd hebbt ehr ünner ehren Ökelnaam „Naddel“ kennt – nu is de Hamborgerin Nadja Abd el Farrag storven. So as mehre Medien dat schrieven doot, is se in’t Öller vun sösstig Johr in en Krankenhuus in Hamborg dootbleven. Bekanntworrn is „Naddel“ vör allen Dingen, wiel se över Johren henweg mit den Popstar Dieter Bohlen tohoopween is. Later hett se fakener an Reality-Shows an deelnahmen. Nadja Abd el Farrag hett al lange Tiet mit ehre Sundheit to doon hatt.
Liekers dat Wedder schöön is un dat dagsöver ok recht wat warm, kann een in Hamborg noch nich in dat normale Freebad gahn. Bäderland maakt ok düsse Week noch nich apen. Un dat liggt doran, dat dat nachts noch to koolt is. Dat hett de Böverste vun Bäderland, Michael Dietel, nu seggt. Man dat gifft aver söss Steden, wo een buten swümmen kann un wo se dat ganze Johr över apen hebbt. Un dor höört dat Kaifubad, dat Familjenbad Rahlsteed un dat Billebad to.
Vundaag schient de meiste Tiet de Sünn. Eerst na’n Avend hen kaamt denn noch ’n poor mehr Wulken hento. Dat blifft aver dröög. Un de Temperaturen liegt vundaag so bi üm un bi 22 Graad. Morgen wesselt sik denn Sünn un Wulken ’n beten wat mehr af as vundaag. Liekers aver blifft dat ok dor meisttiets dröög bi Temperaturen vun bet to 19 Graad.
