Mit dat Auto direktemang vör de Döör vun de School henfohrt warrn - dat is för masse Hamborger Kinner ganz normal. De Bezirk Noord will nu kieken, woans se de so nöömten "Öllerntaxen" utbremsen köönt. Dat hett de Bezirksversammeln güstern so afmaakt. Mööglich sünd dor woll so nöömte Haal- und Bringzonen, de en Stück vun de School wietaf sünd. Vörstellen köönt se sik ok Ecken, wo een gor nich anhollen dröff un Straten, de to'n Anfang un Enn vun de School kumplett för Autos dicht maakt warrt.
Dor sünd al wedder en Barg Drogen funnen worrn. Dorbi geiht dat woll üm mehre hunnert Kilogramm Kokain, de se in Nee Wulmsdörp an de Stadtgrenz vun Hamborg sekerstellt hebbt. Polizei und Toll hebbt dat Ruuschmiddel rund üm en Lagerhall affungen. Dat is eerst twee Weken her, dor hebbt se en Fund vun mehr as twee Tunnen Kokain präsenteert.
De Storm harr dat in sik, dat sä de Gourverneur vun Florida över Hurrikan Milton. Minnst teihn Minschen sünd dorbi to Dode kamen. In Florida weern mehr as dree Millionen Minschen ahn Stroom. Man he hett nich so'n groten Schaden anricht, as de Behöörden dacht hebbt. Man Delen vun den US-Bunnsstaat staht jümmer noch ünner Water.
De Autobahn 7 warrt över't Wekenenn wedder kumplett dichtmaakt. Un dat al vunaf vunavend Klock teihn twüschen Stellingen un Heimfeld. Dor hebbt se de Fohrbahn al mal vör dree Weken dicht maakt. Man wieldat dat pladdert hett, kunnen se dor nich asphalteren. Dat haalt se nu na. Maandagmorgen sall de A7 wedder freegeven warrn.
De israeelsche Armee hett in de Nacht al wedder Steden in't Zentrum vun Beirut in'n Libanon angrepen. Folgens dat libaneesche Sundheitsministerium sünd dorbi 22 Minschen to Dode kamen. 117 sünd versehrt worrn. Wat ut Sekerheitskreisen to hören is, wullen se woll mit den Angreep en Hisbollah-Funkschonär drepen, de hooch in'n Rang stahen deit. Wat de Mann een vun de Doden is, dat weet een noch nich.
Dat marode Brüchen, Bahnstreken un Straten nee instand sett warrn mööt, dat is kloor. Man dat mutt ok betahlt warrn. Dorför hebbt de Verkehrsministers vun de Länner för en milliardensworen Infrakstruktur-Fonds stimmt. Bet nu warrt över masse Boprojekten jedeen Johr nee entscheedt.
Hamborg hett en Eliteschool vun't Johr. De Grund- un Stadtdeelschool Dulsbarg. De hett de Düütsche Olympsche Spoortbund nu utteekt wieldat se sik so för den Spoort insetten deit. De School kriggt nu en Prämie vun 10.000 Euro, dat se noch mehr Talenten en Stütt geven kann. Un denn hebbt se güstern noch de Hamborger Spoorttalenten vun't Johr ehrt. Dat sünd de Freewater-Swömmer Jonas Lieschke, Wietspringersch Lena Anochilli un dat U14-Hockeyteam vun'n HTHC.
