De Hamborger Polizei hett güstern Avend un in’e Nacht ornlich wat to doon hatt. Se harrn dor mit mehrere grote Insätz to kriegen: In’n Florapark an’e Schanze geev dat en Klopperee, wo 20 junge Lüüd mit bi ween sünd. Twee vun jüm sünd licht bi wat to Schaden kamen, veer vun jüm hebbt se eerstmal ut’n Verkehr trocken hatt. In’e Swümmhall Inselpark in Willemsborg müssen fief Kinner na’t Krankenhuus hen. Dor harrn welk Reizgas in’e Luft puust. Wokeen dat ween is, weet een aver noch nich. Un in’t Karoviddel hett in’e Nacht en Fro en Keerl daalstaken hatt. Na de Fro warrt noch na söcht. Bi den Keerl geiht dat nu aver nich mehr üm Leven un Dood.
// Stand: 13.05.2022, Kl. 9:30
In’e Ukrain sünd, so as dat utsüht, woll mehr as 100 Krankenhüüs tweimaakt worrn, sietdem dat dor mit den Krieg losgahn is. Vun düsse Tahl snack Präsident Wolodymyr Selenskyj un smeet Russland Barbarei vör. Totiets warrt internatschonaal ok wieder verhannelt. Dor geiht dat üm, an’n Enn denn de Suldoten ut’e Ukrain ut dat Stahlwark in Mariupol to retten.
// Stand: 13.05.2022, Kl. 9:30
Vundaag warrt in’n Bunnsdag över de Rent snackt. Un dor schall dat woll soveel bavento geven, so as in’e letzten Johrteihnten nich mehr. In’n Westen schall de Rent üm mehr as fief Perzent anstiegen, in’n Oosten üm mehr as söss Perzent. Güstern Avend, dor hett de Bunnsdag al afnickt hatt, de Lüüd vun’t Geld her ünner de Arms to griepen, wieldat de Energiepriesen so stark na baven gahn sünd. Alleen düt Johr schüllt de Lüüd meist veereenhalf Milliarden Euro sporen, to’n Bispeel dör weniger Stüern.
// Stand: 13.05.2022, Kl. 9:30
Vele Hamborger Öllern vun lütte Kinner mööt sik vundaag wedder wat anpassen, denn de Warnstreiks in’e Kitas gaht wieder. Un dat gellt ok för welk vun de sozialen Deensten. Bi de Elvkinner blifft dorüm jede föffte Steed dicht. Annere Drägers, so as de Arbeiter-Samariter-Bund oder Asklepios, de beedt dat Oppassen hier un dor blots för Nootfäll an. Alltohoop geiht dat üm en Tarifverdrag, de för ganz Düütschland gellen deit.
// Stand: 13.05.2022, Kl. 9:30
In Hamborgs öffentlichen Ünnernehmens hebbt to wenig Froonslüüd dat Seggen. Dat tominnst finnt de Senaat, dat dat so is un stellt nu ne’e Regeln dorför op’e Been. En Andeel vun 22 Perzent in’e Chef-Etagen weer nich noog. Op lange Sicht schült an’n Enn denn vun de üm un bi 80 Posten, üm de dat gahn deit, de halven vun jüm mit Froonslüüd besett ween. Dorför schüllt de Steden in’e Tokunft so utschreven warrn, dat Froonslüüd sik ehrder ansnackt föhlt. Ok bi Dubbel-Spitzen mit de Mööglichkeit för Teilzeit warrt keken, wat dor gahn deit.
// Stand: 13.05.2022, Kl. 9:30
Wokeen in Hamborg mit de Bahn ünnerwegens is, de mutt mit Maleschen reken. Bi den Brand an’n Bahnhoff Sternschanze hebbt an’n Avend, so as dat utsüht, woll ok‘n poor Kavels wat bi afkregen. Dorüm fallt mehre ICE un IC-Töög ut oder föhrt later. Dat geiht üm de Verbinnen op de Streck Hamborg-Berlin un Hamborg-Hannober. Ok IC-Töög vun Hamborg na Däänmark fallt ut un dat woll noch bet na’n Middag hen.
// Stand: 13.05.2022, Kl. 9:30
In’n eersten Deel vun’n Dag staht de Wulken bavenan. Dor hett de Sünn kuum en Schangs. De lett sik denn eerst in’n tweten Deel vun’n Dag sehn, wo dat denn’n beten wat fründlicher wedder warrt un to’n Avend hen schient se denn noch mal ganz ornlich. Alltohoop kann dat bet dorhen aver hier un dor ok mal Regen geven un de Wind weiht denn mennigmal ok mal’n beten wat duller. Un dat Ganz finnt vundaag statt bi Temperaturen vun bet to achtteihn Graad. Opstunns sünd dat twölf Graad op’e Veddel. De Utsichten: Morgen un övermorgen kriegt wi denn mehr Sünn as Wulken. Morgen kann denn villicht hier un dor ok noch mal dat een oder anner Regenschuer mit bi ween, meisttiets blifft dat aver dröög bi Temperaturen vun knapp över twintig Graad.
// Stand: 13.05.2022, Kl. 9:30
