Dat is nu al so, dat in’n Hamborger Haven ganze Tunnen vun Kokain affungen warrt. Un dat kunn noch mehr warrn. Dorüm wüllt se in en internatschonale Kunferenz doröver snacken, wat een gegen dat Smuggeln vun Drogen doon kann. Morgen geiht dat dormit in Hamborg in’n Kaispieker B los. Dor warrt Lüüd ut söss europä’sche Länner mit dorbi ween.
Na den Angreep op den SPD-Europa-Afornten Matthias Ecke sind poor dusend Lüüd bi Demonstratschonen gegen Gewalt un för Demokratie op de Straat gahn. Dat geev en Kundgeven vör dat Brandenborger Door ünner dat Motto „Uns Demokratie lett sik nich inschüchtern“- Wat de Polizei seggt, weern üm un bi 2.000 Minschen dor. In Dresden hebbt sik bummelig 3.000 Lüüd versammelt.
An'n Flooghaven Hamborg hebbt se jümmer noch Maleschen mit de Loopbänner för de Packelaasch. Flooggäst süllt dorüm ok vundaag minnst twee Stünnen ehrdat de Fleger afheven deit dor ween. De Technikers versöökt al siet güstern, de Saak wedder in de Reeg to bringen. Flooggäst de ankaamt, dröppt dat Ganze nich.
In't Schanzenviddel is vunmorgen en 79 Johr ole Fru in ehr Wahnung an't Schullerblatt sturven. Dat hett dor brennt. Folgens der Füerwehr weer de Wahnung bannig dull vullstellt un vull vun Müll. Söss Hüerslüüd vun dat verstöckig Mehrfamilienhuus hebbt se twüschentiets in en HVV-Bus ünnerbröcht. Mehr as 40 Füerwehrlüüd weern in'n Insatz.
De Bedrieverschen vun de söss Fruunshüüs in Hamborg bruukt mehr Geld un Mitarbeiders. Se sünd siet Johrn utlast. In’t verleden Johr weern de Plätz to’n Schuul för Fruunnsminschen un Kinner meist kumplettemang besett. Wat de Senat seggt, kunnen liekers all, de dor Hölp nödig harrn ünnerbröcht warrn.
Siet vunmorgen rullt de Töög vun de U-Bahnlinen 2 un 4 wedder vun un na Mümmelmannsbarg hen. Dormit geiht een vun de längsten Sparrns vun de Hamborger U-Bahn toenn. Een Johr lang weern se af den U-Bahnhoff Horner Rennbahn mit en Bus ünnerwegens, den se dor egens för inricht harrn. Bet to 50.000 Lüüd hebbt em an'n Dag bruukt.
Vundaag lett sik recht wat lang de Sünn blicken, ganz ahn Wulken geiht dat liekers nich. Op bet to 19 Graad schafft de Temperaturen dat hüüt noch.
Morgen hebbt wi poor Wulken mehr an Bord, dat drüppelt ok af un an mal, man de mehrste Tiet blifft dat liekers dröög. De Temperaturen bringt morgen nich mehr as blots noch bet to 17 Graad.