In dat Familien-Drama üm de Hamborger Block-Familie, dor hett de Staatsafkaatschop söven Lüüd anklaagt. Dorünner ok de Steakhuus-Arvsche Christina Block. Ehr warrt vörsmeten, dat se wat dormit to doon harr, dat ehre Kinner in de Neejohrsnacht 2024 wegroovt worrn sünd. De 51-Johr ole Ünnernehmersche schall den Opdrag geven hebben, ehrn Söhn un ehre Dochter mit Gewalt vun den Vadder wegtohalen un na Düütschland to bringen. De Block Afkaat hett dat op NDR-Anfraag torüchwiest.
De dode Papst Franziskus, de warrt in Rom bisett. In een halve Stünn gaht de Fierlichkeiten op den Petersplatz los. De Vatikan rekent mit Hunnertdusende vun Besökers. Ok vele Staatsgäst ut de ganze Welt hebbt sik anmellt. Dorünner Bunnspräsident Frank-Walter Steinmeier un Noch-Kanzler Olaf Scholz. Op sien egen Wunsch hin warrt Franziskus in’n Ansluss nich in’n Petersdom bisett, sünnern in de Kark Santa Maria Maggiore.
In’n Hamborger Bezirk Mitt, dor wüllt SPD, Gröne un FDP över en Ampel-Koalitschoon schnacken. Man dat gifft siet Johren al Striederee twüschen Rot-Gröön. Dorüm schall, wat NDR 90,3 to weten kregen hett, ok de Gröne Lannsspitz mit in’t Boot haalt warrn. Se schüllt hölpen, de olen Striedereen ut de Welt to kriegen. Na de Bezirkswahlen harr de ole Regeren ut SPD, CDU un FDP keen Mehrheit mehr.
In vele düütsche Städter wüllt Rechtsextremisten vundaag op de Straat gahn. En Opmarsch is ok in de Hamborger Binnenstadt plaant. Se rekent mit rund 1.000 Lüüd op’n Heidi-Kabel-Platz, de vun dor to’n Jungfernstieg lopen wüllt. Anmellt hett dat Nicole Jordan. Se is de Frontfruu vun den formaal oplösten völk‘sch-natschoonalist‘schen Flögel vun de AfD üm den Rechtsextremisten Björn Höcke. En Föddern: Flachendeckende Grenzkuntrullen. Dat Bündnis gegen Rechts hett to twee Gegenkundgaven opropen.
In dat fröhere Karstadt-Spoort-Huus in de Binnenstadt is siet dree Johr dat Kreativzentrum JUPITER ünnerbrööcht – vundaag warrt Afscheed fiert. Den ganzen Dag över gifft dat Aktschonen – De Daakterass is apen un in de Bor löppt bet Klock dree in de Fröh Musik. Bavento gifft dat för dat JUPITER en Stratenfest. An’n Middeweken maakt dat denn för ümmer to. De Lüüd, de dat Huus tohöört, de hebbt op NDR-Nafraag nix dorto seggt, wat se nu vörhebbt mit dat Huus.
An’n Töllenspieker Hööfttdiek is al wedder en Rennradfohrer verunglückt. Wat de Polizei seggt, is de Mann güstern Namiddag ahn to bremsen in en Auto föhrt, dat parkt hett. Wohrschienlich mit en hoget Tempo. Dorbi is de Radfohrer swoor to Schaden kamen un in en Klinik brööcht worrn. Dat geiht bi em aver nich üm Leven un Doot, as se eerst dacht hebbt. De Töllenspieker Hööfttdiek in Kirchwarder warrt geern as Rennradstreek bruukt.
Hüüt schient de Sünn, namiddags kaamt ein poor lockere Wulken vörbi, man dat blifft fröndlich un dröög bi bet to 19 Graad. Opstunns meet wi bi ju op Finkwarder 7 Graad. Morgen ist dat meist so as vundaag.
