De SPD un de Grönen wüllt mit jümehr Regerensarbeit in Hamborg tohoop wiedermaken. Details dorto staht nu op 148 Sieden in den ne’en Koalitschoonsverdrag binnen. Ut de Oppositschoon gifft dat aver al veel wat an Kritik: Denn so as de Böverste vun’e CDU, Dennis Thering, dat seggen deit, fehlt dorbinnen wichtige Tokumstthemen, so as Verkehr, Weertschop oder Sekerheit. De Linken-Frakschoonsvörsittersch, Heike Sudmann, de vermisst dorbinnen Ideen, woans se gegen dat soziale Spalten un gegen de Armot wat maken wüllt. Un de AfD bekrittelt, dat bi dat Thema Migratschoon wiederhen vun en „Willkommenskultur“ snackt warrt.
Vör üm un bi twee Weken geev dat an en Bushollsteed in Billsteed en Messattack. Twee Minschen sünd dorbi to Schaden kamen, wo ok en Rullstohlfohrersch mit tohören deit. Dorna hebbt se mit en Bild na den Däder söcht un dat hett woll wat bröcht. Denn de Polizei hett nu en 33 Johr olen Keerl in Billsteed fastnahmen, den se ok al vun fröher her kennen doot, blangen anner Saken wegen en brutolen Rooföverfall un Vandalismus. De Syrer kööm 2015 na Düütschland hen, stünn ne Tiet lang as Intensivdäder in’e Paperen, hett aver ok en Schuulstatus.
Warrt dat bald Freden geven twüschen de Ukrain un Russland? US-Präsident Donald Trump is dor in düsse Saak wiederhen toversichtlich. Denn so as welk Medien dat schrieven doot, maakt de USA den Vörslag, dat Russland de Kontroll över de Ecken, de se al innahmen hebbt, behollen deit. Un bavento müss de Ukrain op Duer op verzichten, dat se in‘e NATO ringahn doot. Wenn Russland dorvun afsehen dee, dat se nich de ganze Ukrain besetten wullen, denn harr Russland al en ganzen Barg wat nageven. So tominnst denkt Trump över de Saak.
Bi’t Flegen kann dat ümmer mal’n beten wat hen un her gahn. Deswegen kriggt een as Flooggast ok nich glieks Geld, wenn dat mal wehdoon deit. So hett sik nu tominnst dat Hamborger Amtsgericht in en Fall fastleggt. Denn en Fro, de vun Hamborg na Ibiza henflagen is, de harr klaagt. Ehr Fleger kööm in en swoor’t Gewidder rin un sack vun’e Höög her af. Deswegen wull se 5.000 Euro vun de Floogsellschop hebben. Aver de Amtsrichters hebbt de Klaag nu afwiest.
Wokenn an düt Wekenenn in un üm Hamborg rüm mit dat Auto ünnerwegens ween will, de mutt sik op Staus hebben. Denn hüüt Avend warrt al de eersten Straten för den Hamborg-Marathon dichtmaakt. Denn de finnt düssen Sünndag statt un morgen gifft dat hier al de eersten Lööp för Kinner. Bavento speelt Sünndag denn ok noch de HSV tohuus in dat Volksparkstadion. Un denn warrt af hüüt Avend bet Maandagfröh noch de Autobahn, de A1, in Richt na Noorden hen dichtmaakt. Grund hierför sünd Boarbeiden an de Noorderelvbrüch.
Un wedder is dat passeert: Güstern Avend geev dat noch mal wedder en Füeralarm in dat Westfield Inkoopscenter. Gegen Viddel vör acht güng in dat Kino de Rookmeller los. Dorophen hebbt se dat Kino rüümt. Un de Füerwehr rück gau ut un meist jüst so gau ok wedder af, denn dat Ganze is wedder en verkehrten Alarm ween un twoors al de veerte siet se de Dören in dat Westfield apen maakt hebbt.
Dor bruukt dat gor nich veel Wöör, bringt ok bi Scrabble nich so vele Punkten: Dat is de „Sünn“. Dor kriegt wi de tokamen Daag ‘n ganzen Barg vun. Man toeerst kriegt wi bet hüüt Namiddag noch’n poor Wulken to sehn, un de Temperaturen liegt vundaag so bi üm un bi 16 Graad. Un denn geiht dat los: Hüüt Namiddag kummt se denn so richtig wat rut de Sünn un blifft denn ok’n poor Daag lang.
