Den ne’en Paapst Leo XIV. hebbt Lüüd ut‘e ganze Welt to siene Wahl graleert. Bunnskanzler Friedrich Merz ünnerstreek, in Düütschland keken de Minschen mit Toversicht un positiv Verwachten op de Amtstiet. US-Präsident Donald Trump snack bi de Saak vun en Freid un en grote Ehr för de USA. Leo XIV. kummt ut Chicago. Un de Hamborger Erzbsichop Stefan Heße sä, he glööv, dat Leo XIV. in de Footstappen vun Paapst Franziskus pedden un de Kark wieder in’e Tokumst rin föhren warr.
Twee Daag nadem he in sien Amt losleggt hett, hett Bunnskanzler Friedrich Merz güstern ok mit US-Präsident Donald Trump an’t Telefon snackt. So as de Bunnsregeren dat seggen deit, wullen beide de Kabbeleen in’n Hannel gau vun’n Disch kriegen. Bavento wullen se tohooparbeiden, dormit de Krieg in’e Ukrain en Enn fünn. Merz un Trump harrn woll dörtig Minuten lang an’t Telefon mit’nanner snackt.
De Hamborger Polizei geiht de Saak nu op’n Grund, nadem in Jenfeld schaten worrn is. An’n Avend harrn sik an’n Öjendörper Damm welk Mannslüüd streden hatt. Un dorbi is ok schaten worrn, wo en Keerl op Leven un Doot swoor wat bi to Schaden kamen is. Em müssen se achterran ok nootopereren. En anner Keerl hett bi de ganze Saak en Platzwunn an’n Kopp bi afkregen. De Polizei is mit en ganze Reeg wat an Beamten togangen ween. Dorbi harrn se dree verdächtig Lüüd bi fastnahmen.
Op Finkwarder hett dat hüüt fröh in en Eenfamiljenhuus an’n Neßdiek anfungen to brennen. So as de Füerwehr dat seggen deit, harr dat dor vöraf en Verpuffen geven. Een Minsch is dorbi to Schaden kamen. Wegen den ganzen Rook, de sik dorbi billt hett, seggt de Füerwehr schullen de Anwahners op Finkwarder un Delen vun Francop jümehr Finster un Dören dichtlaten. Noch is de Füerwehr dor bi de ganze Saak wat bi togangen.
30 Millionen Euro wullen se tohoopkriegen un dat hebbt se meist ok henkregen. De FC St. Pauli hett mit siene Genootschop knapp 29,2 Millionen Euro in’e Kass rinkregen. Mehr as 22.000 Liddmaten hebbt an de ganze Saak an deelnahmen. Un mit dat Geld warrt denn 15 Millionen Euro aflööst, de se för dat Stadion an’t Millerndoor utlehnt harrn un ok Schullen ut’e Corona-Tiet warrt mit dat Geld trüchbetahlt.
De Havengeboortsdag geiht mit en Mix ut Sünn un Wulken los. Meisttiets aver blifft dat dröög bi Temperaturen vun bet to 20 Graad un wenig Wind. Un de neegsten beiden Daag seht denn ok nich veel wat anners ut as vundaag.
De ne'e Regeren in Hamborg steiht. To't drütte Mal is Peter Tschentscher to'n 'Eersten Börgermeester wählt worrn. All 70 Afornten vun SPD un Gröne weern bi de Wahl dor. Tschentscher kreeg in geheeme Aftimmen gors 71 Stimmen, also minnst een ut de Oppositschoon. Dorna hett de Börgerschop de ne'en Senaters un Senaterschen bestätigt. De hele Senat kreeg blots 68 Stimmen. Dor geev dat also minnst twee, de dor afweken sünd. En ne'et Gesicht is Maryam Blumenthal. De Co-Parteivörsittersch vun de Hamborger Grönen is nu Wetenschopsenatersch.
