Op düssen Dag hebbt vele Fans vun St. Pauli un HSV op töövt: Hüüt Avend halvig söven warrt dat Stadtderby anpepen. Un wat den Spoort angeiht, dor geiht dat vundaag üm veel, denn de HSV kann ut dat Opstiegsrennen rutflegen. Un St. Pauli kann op de anner Siet in’n Volkspark jümehren Opstieg kloormaken. De Hamborger Polizei kriggt Stütt vun Schandarms ut veer Bunnslänner un vun’e Bunnspolizei. Plaan is, de Fans vun de beiden Verenen klipp un kloor utenannertohollen.
To’n Anfang vun dat verleden Johr geev dat en Cyber-Angreep op de SPD. Domals sünd dor E-Mail-Konten knackt worrn. Un dorför gifft de Bunnsregeren nu welk Lüüd vun den Militär-Geheemdeenst ut Russland de Schuld. Staatliche russische Hacker hebbt Düütschland in’n Cyber-Ruum angrepen. Dat sä Butenministersch Annalena Baerbock. Se möök aver ok künnig, dat dor deswegen noch wat op nakamen dee. Man wat dat nipp un nau weer, dor sä de Grönen-Politikersch noch nix to.
Allens dat, wat in Gaza toschannenmaakt worrn is, dat hett dat so in de Oort siet den Tweten Weltkrieg nich mehr geven. Dat sä de UN-Entwickelns-Agentur UNDP. Wiel, dat sik de humanitäre Laag in Gaza wieder verslimmern deit, stoppt de Törkei nu den Hannel mit Israel. Un dat schall so laang duern, bet de ganze Hölp na Gaza hen dörlaten warrt. Israel smitt de Törkei nu vör, dat de sik nich an Verdrääg hollen deit.
Vun hüüt af an finnt Hamborgs Lüüd de Wählernarichten för de Bezirks- un Europawahl in jümehren Breefkasten. Un düsse Wahl is an’n 9. Juni düt Johr. Bummelig 1 Million 430 Dusend DIN A4 Ümslääg warrt bet hen na‘n 18. Mai mit de Post verschickt. Dat sünd alltohoop 220 Tünnen Papeer. Mit dorbi liggen doot ok all de Informatschonen, de een för de Breefwahl bruken deit.
Un de Hamborger Linke hett mit den Bezirks- un Europawahlkampf güstern Avend al in Altna losleggt. Mit dorbi ween sünd ok jümehr beiden Top-Kannidaten för Europa: Martin Schirdewan un de parteilose Carola Rackete. Schirdewan will sik in dat EU-Parlament blangen anner Saken dörför stark maken, dat een de Wahnungskonzernen, de an’e Börs hannelt warrt, de Lizenz dorför wegnehmen deit. För Rackete steiht en soziaal gerechte Klimaschuul ganz baven mit an. Alltohoop sünd tweehunnert Lüüd vun’e Linken bi de Veranstalten güstern in’e Fabrik in Altna mit dorbi ween.
De Köhlbrandbrüch warrt dat ganze Wekenenn över dicht maakt. Op’n Plaan staht de normalen Arbeiden, wo se de Brüch nakieken un utbetern doot. Los geiht dat hüüt Avend Klock teihn. Bet Maandagfröh wüllt se dormit denn dör ween. So seggt dat de Hamborger Havenbehöörd. De Ümweg geiht över de Kattwyk- un Rethe-Klappbrüch, wat denn ok op Schiller stahn deit.
De Dag güng un geiht goot los mit veel Sünn. Man de Wulken warrt mehr. Un af middags kann denn ok mal dat een oder anner Regenschuer mit bi ween. Un ok enkelte korte Gewidder sünd mööglich. Wenn dat Ganze denn vörbi is, denn lett sik de Sünn aver ok wedder ’n beten wat mehr sehn bi Temperaturen vun üm un bi twintig, eenuntwintig Graad. Opstunns sünd dat op’e Veddel söventeihn Graad. Morgen kriegt wi de Sünn denn ’n beten wat weniger to sehn as vundaag. Meisttiets blifft dat aver dröög bi üm un bi achtteihn, negenteihn Graad.
