Bunnskanzler Friedrich Merz is in de Ukraine ankamen – tohoop mit den franzö’schen Präsidenten Emmanuel Macron un den brit’schen Premierminister Keir Starmer. Vundaag wüllt se mit den ukrain’schen Präsidenten Wolodymyr Selenskyj Raat slaan. Ok de poln’sche Regerenschef Donald Tusk is mit dorbi. De Länner wüllt Kiew Stütt geven, in Moskau en Wapenroh vun 30 Daag dörchtosetten.
Dütt Wekenenn is wedder bannig wat los in Hamborg. Ok vundagg – an’n tweten Dag vun’n Havengebortsdag – rekent se wedder mit Hunnertdusende an de Elv. De Lüüd köönt sik vele Scheep ankieken un dat gifft ok wedder en Sleperballett. Mag wenn, dat dat bavento en grote Opstiegsparty geven warrt: wenn de HSV an’n Avend to Huus gegen den SSV Ulm winnen deit. De Polizei hett sik praat maakt för en lange Kiez-Nacht. För morgen is noch en grote Demo anmellt – för en Verbottsverfohren gegen de AfD.
Vun’n HVV gifft dat gode Narichten: De Fohrtüüg in’n Hamborger Verkehrsverbund sind pünktlicher. Dat wiest en Senaatsantwoort op en CDU-Anfraag. In’t eerste Quartaal sünd 98 Perzent vun de Töög pünktlich west. An toverlässigsten sünd wedder mal die U-Bahnen. De pünktlichste S-Bahnlinje is de S2 na Bardörp. Bi de Bussen, dor kömen alleen in’t eerste Quartaal över 100-dusend to laat.
Op’n Hamborger Barg an de Reeperbahn is hüüt in de Fröh en Mann swoor to Schaden kamen – he is mit en Mess daalstaken worrn. Wat de Füerwehr seggt, is de bummelig 30-Johr ole Mann in en Krankenhuus kamen. De Däter is op de Flucht. Wat dorachter steken deit, is noch nich kloor. De Kriminaalpolizei ünnersöcht de Saak nu.
An de düütschen Butengrenzen, dor warrt woll meist all Lüüd, de Asyl- un Schuul söcken doot, torüchtschickt. Utnahmen sünd: Swangere, Kranke un Minnerjöhrige, de alleen sünd. Dat hebbt de Chefs vun de Warkschop vun de Polizei un de Düütsche Polizeiwarkschop de „Bild“ seggt. Se menen, dat geev en Anwiesen vun CSU-Bunnsbinnenminister Alexander Dobrindt, an de se sik holen mööt. Dat is anners, as dat wat CDU-Kanzler Friedrich Merz künnig maakt harr: Grenzkontrollen as bi de EM. Man dormals, dor weren keen Minschen torüchschickt worrn, de Asyl söcht harrn. Fachlüüd meent, dat weer ok gegen EU-Recht.
Margot Friedländer, de dat Holocaust överleevt harr, de is güstern in’t Öller vun 103 Johr in Berlin storven. En Dag na de Fierlichkeit to 80 Johr Befreen. Ehr Leven harr se bet toletzt dorför insett, över de Verbreken vun de Nazis optokloren. Friedländer schull güstern vun‘n Bunnspräsident Frank-Walter Steinmeier dat Grote Bunnverdeenstkrüüz kriegen. Steinmeier hett as vele annere Politikerschen un Politiker Andeel nahmen: Friedländer harr Düütschland Versöhnen schenkt – liekers all dat, wat de Düütschen ehr andaan harrn, so de SPD-Politiker.
Vundaag hebbt wi Wulken, aver ok Sünn. Dat is meist dröög bi bet to 20 Graad. Opstunns meet wi bi ju in Willemsborg 9 Graad. Morgen kann de Dag mit Wulken an un Nevel anfangen, man sünst schient de Sünn bi bet to 20 Graad.
