Hamborg, Antwerpen, Rotterdam – de Drogensmuggel över de Havens in Europa is en groot Problem. Wat man dorgegen maken kann, dor hett Hamborgs Börgermeester Peter Tschentscher in Berlin över snackt tohoop mit sien Amtskollegen ut’e Havenstäder in Belgien un de Nedderlannen. Un dor hebbt se nu bi fastleggt, dat se enger tohooparbeiden wüllt. Bavento plaant se ok Standards, de denn bi de Kuntrull vun‘e Containers un bi Delen vun’e Technik för all gellen doot.
Wat de Sekerheit angeiht, dor löppt woll sachts bannig wat scheef bi dat Berufsfortbildungswark an’e Billstraat, wo een kort ok BFW to seggen deit. Dor vertellt tominnst vörmalige Schölers un Utbillers vun, de nu exklusiv mit den NDR snackt hebbt. Dorna to uurdelen sünd bi dat BFW oorole Maschinen nich nakeken un pleegt worrn, so dat een dor op Leven un Dood to Schaden kamen kunn. Dat Amt för Arbeitsschuul tell ok en ganze Reeg Mängel op, de op’e Hand liggen doot. To’t Bispeel fehlen an Maschinen de Nootknööp för dat Utschalten. Dat BFW aver snackt dor op’e anner Siet bi de Saken, de de Behöörd optellen dee blots vun „Optimerenshenwiesen“, de för sik nahmen normaal weren.
Nipp un nau hunnert Daag is Hamborgs ne’e Schoolsenatersch Ksenija Bekeris nu in ehr Amt. Ehr Vörgänger Ties Rabe harr ja domals wegen sien Sundheit sien Hoot nahmen. De SPD-Politikersch will de Programmen utboen, de Kinner ünner de Arms griepen doot, dormit de later denn betere Schangsen hebbt. Öllern- un Schölervertreders verlangt aver kunkrete Strategien, dormit all glieke Schangsen hebbt. Bavento bekrittelt se, dat ümmer noch to veel Ünnerricht utfallen dee. De Schoolsenatersch is vundaag ok bi dat NDR Hamborg Journal to Besöök. Un dat kann een hüüt Avend in dat NDR Fernsehen af Klock halvig acht sehn.
De Bunnsdag kann vundaag, so as plaant, dat Klimaschuulgesett vun de Ampel-Regeren un wat se ännert hebbt, afnicken. Denn dor geev dat bet toletzt noch Fraagteken. Dat leeg an den CDU-Afornten Thomas Heilmann. De harr noch versöcht, de Afstimmen mit en Ielandrag to verhinnern. Düssen Andrag hett dat Bunnsverfatensgericht nu aver aflehnt. Bi dat Gesett, wat se ümkrempelt hebbt, geiht dat vör allen Dingen üm de Vörgaven, de nee maakt worrn sünd, dormit weniger CO2 in’e Luft puust warrt. Dat heet, dat wat se in’n Sinn hebbt, dat gellt denn nich mehr enkelt för de Sektoren, sünnern blots noch tohoop för all.
In’e Hamborger Binnenstadt geev dat güstern Avend en groten Insatz. Denn dor harr een Keerl anropen un seggt, dat he en Waterliek in dat Alsterfleet an’e Ludwig-Erhard-Straat sehn harr. Polizei, Füerwehr un Reddenslüüd hebbt dorophen denn dor in’e Eck annerthalf Stünnen söcht. Un dat blangen anner Saken mit mehre Bööd un Drohnen. Man bröcht hett dat allens nix. Unkloor is nu, wat dat Ganze an’t Enn denn villicht doch blots en Fehlalarm ween is.
Hüüt Avend warrt dat bannig keddelig bi dat Football-Tweetliga-Speel FC St. Pauli gegen Hansa Rostock. An’t Millerndor gellt, so as ümmer wenn düsse beiden Teams op’nannerdrapen doot, scharpere Regeln, wat de Sekerheit angahn deit. De Afstand to de Hansa-Fans warrt denn grötter maakt. Vun’e Saak her geiht dat bi beide Mannschopen üm veel. Denn Rostock steiht in’e Tabell opstunns op den 16. Platz un mutt dor gegen den Afstieg gegenangahn. Un op’e anner Siet steiht St. Pauli op Platz twee un versöcht optostiegen. Hüüt Avend halvig söven geiht dat los un NDR 90,3 is, kloor, live mit dorbi.
Mit de Sünn duert dat vundaag noch’n beten wat. Opstunns regent dat veleroorts un dat geiht ok eerstmal so wieder. Un de Temperaturen hängt ok eerstmal noch so’n beten wat fast bi üm un bi fief Graad (Kl. 9:30). Later kriegt wie denn noch so üm un bi teihn bet twölf Graad. Aver to’n Namiddag un to’n Avend hen kickt denn noch so’n beten wat de Sünn dör. Un de kriegt wi denn ok dat Wekenenn över to sehn, wo wi denn Sünndag goors bet to eenuntwintig Graad kriegen doot.
