De Ampel-Koalitschon argert sik jümmer noch mit jümehrn Huushoolt rüm. Nu hett sik de Kanzler op de Siet vun Finanzminister Christian Lindner vun de FDP stellt. Lindner harr giern, dat all de Ministerien wat sport – en poor Ministerien harrn man geern mehr Geld. In't Interview mit'n "Stern" sä Olaf Scholz nu: Dat güng dorüm Wünsch un Realitäten tosamen to bringen. Zentraal weer bi'n Huushoolt ünner annern, dat de Weertschop wedder andreven warrt.
Ok in't Hamborger Ümland sünd de Mieten an't Wassen. So steiht dat in en Studie, de se an't Gymnasium Ohmoor maakt hefft. Dor hefft de Schölers de Nettokoolthüern för Hamborg un ümto utrekent. Rutkamen is, dat de Mieters an'n Stadtrand ölven Euro negenunachtig för'n Quadratmeter betahlt: Dat weren 8,5 Perzent mehr as in't Vörjohr. In Hamborg leeg de Neverdragshüer in'n Snitt bi veerteihn Euro achtunföfftig. Dat heet, se weer üm 1,2 Euro torüchgahn.
Dör'n FC Sankt Pauli speelt Hamborg in de tokamen Saison in de eerste Football-Bunnsliga mit. Dat heet ok, dat düütlich mehr in de Kass vun'n Klub rinkummt – un ok de Stadt hett dor woll wat vun. Hamborg Marketing seggt, dat op Hamborg so bunnswiet un ok internatschonal wedder mehr keken warrt. Dat to de Spelen mehr Lüüd un Touristen kaamt: Dormit weer man nich to reken. Denn al in Liga Twee is dat Millerntorstadion jümmer utverköfft ween.
In de Havencity warrt an'n Freedag en ne't Quarteer freegeven: de Strandkai op de Landtung an'n Marco-Polo-Tower. Af un an geev dat dor al in de verleden Johren Kulturevents. Vun dor ut hett man en goden Blick op de Elv, de Elvphilharmonie un historisch Havenkraans. Ok bald fardig sünd twee Wohnblocks mit mehr as dreihunnert Wohnungen: to'n Halfdeel sünd dat Mootschopswohnungen.
Vör de Küst vun Marokko an de Straat vun Gibraltar hefft Orcas al wedder en Seiljacht op Grund sett. Spaansche Medien mellt, de Fahrenslüüd harrn eerst blots hüürt, dat dumpig wat an'n Rump sleit. Achterher weer man Water in de Föffteihn-Meter-Jacht rinlopen. De Schippslüüd müssen en Nootroop afgeven. En Tanker harr denn hulpen un de Lüüd vun't Schipp rett – later weer dat ünnergahn. Vun 2020 af an is dat al dat sövte Mal, dat so wat vörkamen is.
In de Nacht is an de Elvgaustraat in Lurup en Geldautomat sprengt worrn. Ok de Vörruum vun de HASPA-Filiaal is dorbi swoor to Schaden kamen. De Automat hett noch qualmt – de Füerwehr müss kommen un löschen. Wokeen dat ween is, is nich rut. Un wat se dor Geld rutkregen hefft, steiht ok noch nich fast, sä de Polizei.
Vundaag gifft dat wedder veel Sünn – en poor fiene Wulken dorbi. Dat blifft ok dröög un dat warrt wedder warm: bet to süssuntwintig Graad. Morgen gifft dat denn jüst dat Glieke noch mal: warm, dröög – bet to süssuntwintig Graad.