De Hamborger Polizei hett graad mit en Fall an't Corvey-Gymnasium in Lokstedt to doon. Dor geev dat ünner de Schölers en Chatgrupp mit'n Naam "Fight Club". Idee vun de Saak weer woll, dat sik Schölers ut de achten un negenten Klassen kloppt. Un dat nich eenfack so: Se sünd woll ünner Druck sett worrn. Wokeen nich wull, müss Geld betahlen. Na Informatschonen vun NDR 90,3 ünnersöcht dat Lannskriminalamt graad, wat för en Roll en föffteihn Johr olen Jungen dorbi speelt hett. Em warrt vörsmeten: He harr de Grupp organisiert – mööglicherwies mit anner Schölers tosamen.
De Hamborger Haven hett in't eerste Quartal vun't Johr woll düütlich mehr Containers ümslaan at in't eerste Quartal vun't verleden Johr: Süss Perzent mehr weren dat, schrifft de Havenbedriever HHLA. Dormit harr Hamborg mehr toleggt as de Havens in Rotterdam un Antwarp. Blots bi'n Hannel mit de USA weren de Tahlen torüchgahn. Dat harr mit de Toll-Politik vun de Amerikaners to doon.
In Istanbul in de Türkei schall dat vundaag en ne'n Anloop geven, woans de Krieg vun Russland gegen de Ukraine beendt warrn kunn. Drei Johr lang hefft de twee Parteien nich mehr direkt miteenanner an'n Disch seten – un jüst dat schall vundaag passeren. Vun de Türken sünd ok noch Lüüd dorbi. Se hefft dor en Vermittlerroll. Eerst hett dat noch heten, dat dat al güstern en Dropen geven schull – dor is man nix ut worrn.
De FDP will sik nee opstellen. Vundaag maakt se ehrn Bunnsparteidag. Parteibaas Christian Lindner höört op. De ole FDP-Fraktschonsbaas Christian Dürr schall op Lindner folgen. He hett sik vörnahmen: De FDP schall in veer Johr wedder in'n Bunnsdag rin.
Vör't Hamborger Landgericht is de Perzess gegen twee Jungkerls wiedergahn. Jem warrt vörsmeten: Se harrn in'n August in Billstedt illegal en Autorennen op'n Schiffbeker Weg maakt. En Kind vun twee Johr is dorbi ümkamen. Güstern see en Expert vör Gericht: De twee Mannslüüd weren mit Tempo 178 un Tempo 150 ünnerwegens. Mehr as Tempo föfftig harrn se dor op de Straat man nich föhren dröfft.
In Hamborg geiht vundaag offiziell de Badesaison los: to'n Bispeel an Allermöher See, in't Naturbad Kiwittsmoor or in't Sommerbad Volksdörp. Vun nu af an maakt de Bezirksämter dor ok all drei Weken Waterproven. An't Hygieneinstitut warrt de denn ünnersöcht – vörnan op Darmbakterien. Süssteihn offizielle Badesteden staht op de List.
Vundaag is dat eerst noch enigermaten hell un klor. Övern Dag treckt man mehr un mehr Wulken ran – un dat mach ok en beten regen. De Temperatur klattert op bet to negenteihn Graad. Morgen wesselt sik Sünn un Wulken af. Dat blifft dorbi tomehrst dröög: ok wedder bi bummelig bet to negenteihn, twintig Graad.
