Hamborgs SPD un de Grönen hebbt nu jümehren Koalitschoonsverdrag för de ne’e Regeren ünnerschreven. Börgermeister Peter Tschentscher ünnerstreek dorbi güstern in’t Raathuus, dat de Verdrag för beide Sieden en gode Grundlaag weer. Un Hamborgs Twete Börgermeistersch Katharina Fegebank sä, dat de Koalitschoonsverdrag ok bi de Lannsliddmatenversammeln vun’e Grönen grote Tostimmen kregen harr. Man welk vun de groten Themen sünd dor in den Koalitschoonsverdrag aver gor keen Thema, so as dat Projekt Elvtower un de S-Bahn-Tunnel, de vun’n Hööftbahnhoff ünnern Dammdoor langs bet hen na Altna gahn deit.
Dat Maal vun den ne’en root-grönen Senaat is aver wiederhen, dat se jedet Johr 10.000 ne’e Wahnen kloorkriegen wüllt. Sünnerlich swoor is dat in dicht besiedelt Ecken, so as in Einbüddel. Alleen dor müssen, dat Maal vun’n Senaat na to uurdelen, jedet Johr goot dusend Wahnen henkamen. De Bezirk dor hett nu aver stäädsche un private Flachen funnen, op de mööglicherwies boot warrn kunn. In Fraag kaamt dorna Ecken, so as an’n Looksteder Steendamm oder ok de Sportplatzring in Stellingen.
Ok bi’n Bund geiht dat mit de ne’e Regeren vöran, dat se de op’e Been stellen doot. Denn siet verleden Nacht Klock twölf is de Online-Befragen vun de SPD-Liddmaten vörbi, wat de to den Koalitschoonsverdrag mit de Union seggen doot. Vundaag noch will de SPD denn kunddoon, wat dor bi düsse Afstimmen bi rutsuert ist.
Dubbelte Töll för Firmen, de Autos boen doot, dor geiht US-Präsident Donald Trump nu wedder vun af. De Ünnernehmen, de al fiefuntwintig Perzent bavento betahlen doot op de Autos, de in’t Utland boot worrn sünd, de mööt nu nich nochmal wedder Töll betahlen, so as op Stahl un Aluminium. Analysten gaht dorvun ut, dat Trump sien Nageven nu de Autofirmen dat tokümstig ’n beten wat lichter maken deit. Liekers warrt een de Töll bannig dull wat marken.
Wegen de Demos an’n 1. Mai stellt sik de Hamborger Polizei op in, dat se veel wat to Gang ween warrt. Op’n Plaan staht dree grote Kundgevens vun’e linke Szeen. Alleen bi de rekent se för morgen mit bummelig fiefdusend Lüüd, de dor an deelnehmen doot. De Polizei geiht dorvun ut, dat dat dorbi denn lüttere Stöörakschonen geven deit. As Stütt för de Hamborger Polizei kaamt morgen denn Hunnertschopen ut dree anner Bunnslänner hento.
Bi den Hamborg-Marathon verleden Wekenenn geev dat ja en ne’en Streckenrekoord un af vundaag nu kann een sik al för den Jubiläumsloop tokamen Johr anmellen. Dor gifft dat den Marathon denn dat veertigste Mal. Passlich dorto köönt dor denn ganze veertigdusend Lüüd an’n Start gahn, de denn vun’e Tiet her ok’n beten wat na vörn verleggt warrt, dormit denn ok all de Lüüd op’e Streck Platz finnen doot. Un bavento warrt de Halfmarathon denn eerst namiddags anfangen un geiht dor denn an’e Kennedybrüch los.
Vundaag warrt dat meist jüst so as güstern: Veel Sünnschien, wenig Wulken un dat blifft dröög bi Temperaturen vun bet to tweeuntwintig Graad. Un morgen warrt dat denn goors noch’n beten wat beter bi Temperaturen vun bet to sövenuntwintig Graad.
