De Sport-Welt kiekt hüüt na Paris, denn dor schüllt an'n Avend de Olympschen Spele mit en grote Show to'n Anfang losgahn. Wenige Stünnen vör de Fier mellt nu de franzöösche Bahngesellschop SNCF en massive Attack op dat Nett vun de gauen TGV-Töög. Vele Verbindungen mööt wegstreken warrn. De Reparaturarbeiden warrt woll noch dat ganze Wekenenn lang duern. Woans dat to de Brand-Anslääg kamen kunn, dat is noch unkloor.
De Hamborger Grönen wüllt na de Börgerschops-Wahl wedder mit de SPD regeern. In'n Harvst wüllt se op en Parteidag över en egne Börgermeester- oder Spitzenkandidatin entscheden. De Co-Frakschoonsbaas Dominik Lorenzen sä in't Sommer-Interview vun NDR 90,3 un Hamburg Journal, dorför weer Katharina Fegebank de Richtige.
De Schippsverkehr mutt verdrääglicher för de Ümwelt warrn, un dor schall Landstroom bi helpen. Hierför hebbt nu de Hamborger Haven-Verwaltung HPA un de däänsche Reederee Maersk en Verdrag ünnerschreven. De Scheep vun Maersk schüllt an't Containerterminal Eurogate in Tokunft de Energie per Landstroom kriegen. Wannehr dat losgeiht, kann HPA totiet aver noch nich seggen.
Bunnskanzler Olaf Scholz will ok in Tokunft strikte Kontrollen an de düütschen Grenzen, un dat schall helpen gegen illegale Migratschoon. "De Tahlen mööt rünner", sä Scholz to de Saarbrücker Zeitung, un wieder sä de Kanzler noch, dat Erwarvs-Migratschoon nödig un erwünscht weer, man dor kemen to vele Lüüd irregulär. Kontrollen gifft dat totiet an de Grenzen na de Schwiez hen un na Öösterriek, Tschechien un Polen.
De Flüchtlingsünnerkunft in Lütt Bossel/Klein Borstel, de steiht siet goot een Johr leddig, man Anfang August köönt dor nu an de Straat Große Horst wedder Lüüd intrecken, de flücht sünd. 150 Minschen dröövt een Johr lang in dat Containerdörp blieven. In en Schrieven vun de Soziaalbehöörd, dor warrt nu de Bezirkspolitikers informeert. In goot een Johr schall denn dat Grundstück neet beboot warrn.
De Dag bringt brüttige Luft un dicke Wulken, wo jümmer mal Regen rutkummt – hier un dor ok mit Blitz un Dunner. Un dat warrt bet 24 Graad warm. Nu sünd dat in Sülldörp 17 Graad. Morgen denn meisttieds dröög un mehr Wulken as Sünn, bi bet to 23 Graad.
De Vörloop weer lang – güstern denn de Slag: Dat Bunnsbinnenministerium verbüdd dat Islaamsche Zentrum Hamborg. De Hamborger Oppositschoon steiht dorachter, man dat hett ehr to lang duert. CDU-Frakschoonsböverste Dennis Thering meent, dor mööt SPD un Gröne för liekstahn – jüstso seht dat AfD un FDP. De Blaue Moschee an de Alster höört nu den Bund to, mitsamts dat Vereensvermögen vun’t IZH. Warrt seggt, dat dat Islaamsche Zentrum Hamborg vun’t iraansche Regime stüert warrt.