De Reederee MSC veranstalt so'n Oort Mini-Havengeboortsdag an'n 14. Juni. An de Lannungsbrüchen wüllt se denn en 350 Meter langet Containerschipp döpen. Rund ümto gifft dat Boden, Shows un en Kunzert mit de Hamborger Sängersch Zoe Wees. MSC will sik so för den Instieg bi den Havenbedriever HHLA bedanken. Wat dor an uttosetten hebbt de Linken. De seggt, dat Riesen-Event weer nich besnackt worrn un kuum ankünnigt.
De israeelsche Armee hett de Minschen in'n Noorden vun den Gazastriepen opropen, disse Region to verlaten. De Armee seggt, dat weer nu dat letzte Wohrschauen, bevör se angriepen doot. Överto hett de israeelsche Ministerpräsident Benjamin Netanjahu künnig maakt, dat wörr nu en Groot-Offensive in'n Gazastriepen geven, bet vun de Terrororganisatschoon Hamas nix mehr nablifft. De Insatz schall in de tokamen Daag losgahn.
Vun Januar bet April sünd düütlich weniger Minschen illegal in de EU inreist. Dat wiest ne'e EU-Tahlen. So sünd 47.000 Maal de Grenzen illegal överschreden worrn - knapp 30 Perzent weniger as in de eersten veer Maand vun verleden Johr. De EU seggt, de Tahlen sünd op all wichtige Routen torüchgahn. De gröttste Deel an Minschen keem toletzt ut de Länner Bangladesh, Afghanistan un Mali.
In de Kris bi dat Hamborg Ballett, dor schalt sik nu ok de Kulturbehöörd in. De hett seggt, totiet wörrn se mit all Sieden intern snacken. Vörsmeten warrt den ne'en Ballettchef Demis Volpi ünner annern en, as dat heten deit, toxische Arbeitsatmosphäre. Un dat seggt sien Hamborger Ensemble un ok dat vun Düsseldorf - dor hett Volpi arbeidt, bevör he de Nafolger vun John Neumeier worrn is.
De "Filmtheater-Kongress Kino", dat is dat gröttste düütsche Drepen vun de Kino-Branch, un vunaf tokamen Johr finnt dat in Hamborg statt. Denn warrt sik Film-Utlehners, Kinobedrievers un noch vele annere Verbänn in't CCH drepen. Totiet löppt de Kongress to'n letzten Maal in Baden-Baden - un dor is de 50 Johr lang över de Bühn gahn.
Ok vundaag blifft dat wedder dröög, un Sünn un Wulken wesselt sik af – bi bet to 19 Graad. Nu (Klock negen) sünd dat op de Veddel 13 Graad. Morgen denn blots wenig Wulken un veel Sünn, bi nochmal 19 Graad.
Een vun de bekanntsten „Rieksbörger“-Verenigen snackt över sik sülvst vun ‚Königriek Düütschland‘. Un düsse Verenigen, de hett dat Bunnsbinnenministerium nu verbaden. De Polizei dörsöcht deswegen nu ok siet hüüt fröh mehre Wahnen in söven Bunnslänner. Hamborg höört hier nich to. Vör allen Dingen geiht dat üm en Gemeen in Sassen, wo se vundaag ok al Peter Fitzek fastnahmen hebbt. Dat is de, de bi de Verenigen ganz bavenan stahn deit un de sik ok sülvst to’n König maakt harr.
