Nadem de AfD as seker rechtsextremist‘sch inoornt worrn is, kümmt Kritik vun de Trump-Regeren. Beid – de US-Butenminister Marco Rubio un ok Viez-Präsident JD Vance, de seggt op de Plattform X, dat weer en polit’schen Besluss. Dat Utwartige Amt, dat wiest dat kloor torüch. De Verfatensschuul, de hett det Saak nipp un nau un unafhängig ünnersöcht to’n Schuul vun de Verfaten un de Rechtsstaatlichkeit.
In Düütschland sünd wi vun hüüt af an wedder op Pump ünnerwegens: De Bunnsregeren hett, wat de Tahlen angeiht, de natörlichen Ressourcen, de ehr tostahn doot, för dütt Johr opbruukt. Dat hebbt Ümwelt Fachlüüd vun’t „Global Footprint Network“ utrekent. Grünn för den hogen Verbruuk, dat sünd ünnern annern de hoge Energieverbruuk, de Stratenverkehr un de industrielle Deertenholen.
In de KZ Gedenkstee in Neegamm, dor gedenkt se vundaag an de Befreen vör 80 Johr. Brit’sche Truppen weren dormals in Hamborg inmascheert. De Natschonalsozialisten, de harrn vörher all Häftlinge wegbrööcht un Akten tweimaakt. En poor Häftlinge, de harrn sik versteken un de Allieerten vertellt, woför dat Lager dorweer. To de Gedenkveranstalten vundaag, dor kaamt hunnerte vun Gäst ut de ganze Welt. Un en Fruu, de dat överleevt hett: Helga Melmed. Se weer as junge Deern in Auschwitz, Neegamm un Bergen-Belsen.
Dat tweie Bootshuus an’n Alsterwannerweg in Lütt Borstel, dat kann woll wedder opbuut warrn. Dree Johr vöraf weer dat Vereenshuus vun’n Waterspoortvereen Böveralster bi en gräsig Füer afbrennt. Rund 3,3 Millionen Euro schall dat kosten, dat wedder optoboen. Nu steiht ok fast, wo dat betahlt warrn schall. 500.000 Euro fehlt noch – un de wüllt SPD un Gröne in de Börgerschop ut en Fonds för Saneren praatstellen. Över den Andraag warrt de Börgerschop an tokamen Middeweken afstimmen.
In de Football-Bunnsliga hebbt Heidenheim un Bochum an’n Avend 0 to 0 speelt. De FC St. Pauli, de kann dorüm mit en Sieg gegen Stuttgart vundaag den Klassenverblief sekern. Dat geiht halvig veer an’t Millerndoor los.
Vundaag hebbt wi en Wessel ut Wulken un Sünn. Dat is meist dröög bi bet to 18 Graad. Opstunns meet wi bi ju in Hoorn 8 Graad. Morgen kriegt wi vele Wulken, af un to lockert dat op un warrt en beten fröndlich. Över Dag köönt enkelte Flöög daalkamen. Dat Ganze bi bet to 14 Graad.
De Polizei kickt op de Hamborger Mai-Demos vun güstern positiv op trüch. Denn bi de Demos harr dat kuum Twüschenfäll bi geven. Üm un bi 6.000 Lüüd hebbt, de Polizei na to uurdelen, an de Kundgevens vun den Düütschen Warkschopbund an deelnahmen. De DGB snack vun 9.000 Lüüd. De Warkschop verlang blangen anner Saken, apentliche Opdrääg schullen blots noch an Firmen vergeven warrn, de Tarifverdrääg harrn. Un bi dree Demos vun de linke Szeen hebbt düütlich mehr as 10.000 Lüüd an deelnahmen. Een dorvun stünn ünner dat Motto „Gegen en Stadt vun de Rieken“ un dor güng dat de Lüüd üm Wahnruum, den een betahlen kunn.
