In Syrien hebbt se jüst eerst noch den Herrscher Baschar al-Assad ut’t Land verdreven un nu al warrt dor över snackt, dat een flücht Lüüd villicht wedder trüchschicken deit. För Kazim Abaci vun de SPD in’e Börgerschop is de Diskuschoon över düt Thema „Wahlkampfgetöös“. Dat sä he in’n Snack mit dat Hamborg-Journal. Un so as he meent bruukt de Stadt flücht Lüüd ok as Fachkräft. Ok de AfD-Böverste Dirk Nockemann sä, wokeen wohrhaftig bruukt warrt, de schull blieven könen. Un de Frakschoonsböverste vun’e CDU, Dennis Thering, de snackt dorvun, dat dat enkelte Fäll weern, de en Mööglichkeit kriegen schullen, blieven to könen.
Över de Laag in Syrien hebbt güstern ok Bunnskanzler Olaf Scholz un Frankrieks Präsident Emmanuel Macron snackt. Un so as de Bunnsregeren dat nu seggt, sünd se dor beide vun’t Prinzip her praat, dat se mit de ne’en Herrschers in Syrien ok tohooparbeiden wüllt. As Grundlaag hierför, müss aver kloor ween, dat se dor de Minschenrechten inhollen doot un jümehr Hand över ethnische un religiöse Minnerheiten hollt. Scholz un Macron wüllt ok, dat sik de EU starker wat in Syrien engageren deit.
Woans kann de Hamborger Binnenstadt wedder staatscher warrn? To düsse Fraag hett de Stadt över Maanden henweg ok de Menen vun de Börgerslüüd inhaalt. Güstern nu is seggt worrn, wat dor bi rutsuert ist. Un dorna to uurdelen wünscht sik de Lüüd, de se fraagt hebbt, en bunten Mix ut Ladens, Büros, Wahnungen un Kultur. Stadtentwickelnssenatersch Karen Pein glöövt, dat för düsse Saak in’e Twüschentiet ok vele Grundeegners togänglich sünd. Bavento seggt mehr as een Drüddel vun de fraagt Lüüd: Wi kaamt na de Binnenstadt hen, üm Kultur to beleven.
Vele Minschen sünd över de Nina-Wohrschau-App wiesworrn: In Reitbrook is en Huus in’e Luft flagen un achteran steeg en grote Rooksüül op. De Polizei geiht de Saak nu op’n Grund un kickt, wat dor in den Landmaschienenhannel mit Wahnkomplex de Detonatschoon utlööst hett. Op jeden Fall legen in den Gruus vele blaue Kanisters binnen. Dat Huus is tohoop mit de Schüün böös wat twei gahn, en ganze Huuswand is rutreten.
Üm un bi söss Stünnen lang hebbt se mit’nanner snackt hatt, man ahn, dat dor an’n Enn wat bi rutsuert is. Bi Volkswagen sünd Arbeitgever, Bedrievsraat un IG Metall nu ahn en Lösen to hebben ut’nannergahn. Man ümmerhen: Beide Sieden beteken dat Snacken as konstruktiv. Bavento hebbt güstern noch meist 70.000 Lüüd bi VW jümehr Arbeit daalleggt hatt. Vör allen Dingen wüllt se verhinnern, dat VW-Warken dichtmaakt warrt.
En lütte Schangs harrn se egens noch hatt, man reckt hett dat aver nich: De Düütschen Handball-Froonslüüd hebbt dat EM-Halffinaal verpasst. Denn dat steiht nu na den 27 to 32 Daalslag gegen Norwegen een för allemal fast. Morgen draapt de düütschen Handball-Froonslüüd bi de EM noch op dat Team ut Slowenien.
Dat warrt vundaag tominnst beter as güstern. Bet na’n Middag hen kann dat hier un dor villicht noch ’n beten wat an Fisselregen geven. Meisttiets aver blifft dat vundaag dröög. Un ok de Wind is nich mehr ganz so dull as güstern. Deswegen föhlt sik de Temperaturen vundaag denn ok mehr so an as se wohrhaftig ok sünd. Opstunns sünd dat fief Graad in Curlaak. Mehr as söss Graad warrt dat vundaag aver nich. Also allens in allen blifft de Dag vundaag grau in grau. Un morgen süht dat nich veel wat anners ut, man de Sünn hett dor denn villicht noch ne lütte Schangs mehr as vundaag.
