Wokeen mit’e Bahn föhren deit, för den warrt dat vundaag allens anner as licht. Denn de Lokkutschers streikt siet güstern Avend wedder un dat noch bet hüüt Avend Klock teihn. Dat geiht üm den Fracht-, Fern- un Regionaalverkehr. Bi de Hamborger S-Bahn gifft dat en Notfallplaan. Un egentlich schullen op dree Strecken de Töög tominnst all twintig Minuten föhren. Dat haut aber jüst nich överall so recht wat hen. Op de S1 twüschen Ohlsdörp un Poppenbüddel to’t Bispeel föhrt opstunns keen Bahnen. Un twüschen Neegroben un Stood föhrt de Töög vun’e S3 blots in’n Stünnen-Takt. Un anners as bi dat letzte Mal fallt bi de AKN dütmal all Töög ut.
Dat Tovertroen in Bunnskanzler Olaf Scholz is so wiet ünnen as noch nie nich tovör. Dat is bi den ne’en ARD-Düütschlandtrend bi rutsuert. Dorna to uurdelen sünd blots noch twintig Perzent vun de Lüüd, de se fraagt hebbt, tofreed mit‘e Arbeit vun den SPD-Politiker. Un dat is ok de leegste Weert för en Kanzler, sietdem dat den Düütschlandtrend geven deit. Meist jüst so leeg süht dat alltohoop för de Bunnsregeren ut. Mit de Ampel-Koalitschoon sünd blots söventeihn Perzent tofreed. Ok düsse Weert is so wiet ünnen as noch nie nich tovör.
Slechte Ümfragen un bavento de Arger mit de Staatskass: Beides tohoop warrt woll ok den Bunnsparteidag vun’e SPD överschadden, de hüüt Vörmiddag in Berlin losgahn deit. De Hamborger Bunnsdagsafornte Aydan Özoguz seggt, dat de SPD dor sekere politische Leitplanken vörgeven schull. Blangen anner Saken will de SPD de Schullenbrems lockern un snackt ok över högere Stüern för rieke Lüüd.
In den Cum-Ex-Schandool üm de Hamborger Warburg-Bank gifft dat wiederhen Rummel üm twee Laptops. Düsse harr de Justiz vun Noordrhien-Westfalen praatstellt hatt för den Ünnersökens-Utschuss. Man dor sünd ok Daten op ween, de nix mit Cum-Ex to doon harrn un deswegen sünd de beiden Laptops twüschendörch ok inkasseert worrn. So as Computer-Fachlüüd dat seggt, sünd dorbi twoors keen Daten bi wegmaakt, aver womööglich kopeert worrn. Op de Rekners sünd hunnertdusende E-Mails op, blangen anner Lüüd ok vun Peter Tschentscher un vun de Büro-Böverste vun Olaf Scholz.
De statschonären Grenzkuntrullen na Polen, Tschechien un na de Swiez hen warrt dat nu nochmal wat länger geven över den halven Dezembermaand henweg. Dat sä Bunnsbinnenministersch Nancy Faeser to de "Rheinischen Post". De Kuntrullen schüllt minnstens noch twee Maand lang bavento blieven, üm Slüserbannen to stoppen. Siet Midde vun’n Oktobermaand hett de Bunnspolizei bi Kuntrullen dusende Flüchtlingen stoppt, de nich inreisen dröffen.
Nadem se bi’n DFB-Pokaal rutflagen sünd, dreiht sik dat bi‘n HSV wat den Football angahn deit nu eerstmal wedder üm den Opstieg. Morgen kummt de SC Paderborn na’t Volksparkstadion hen. Un Trainer Tim Walter will dor denn ok wedder Stammspelers bi insetten, de he bi’t Pokaal-Speel in Berlin schoont harr. Opstunns steiht de HSV in’e Tabell op Platz dree. Ganz bavenan staht de Spelers vun’n FC St. Pauli, de morgen Avend in Osnabrück ranmööt.
För de Sneemanns weer de Nachtfrost noch’n Segen, man nu fangt dat an to dauen. Noch sünd wi stedenwies bi üm un bi null Graad, dat geiht vundaag aver noch’n beten wat na de Plusgraden hen över so in Richt na een bet twee Graad. Namiddags kriegt wie denn noch’n beten wat an Snee oder ok Sneeregen. Un morgen sünd dat denn al üm un bi fief Graad un Sünndag denn al acht Graad. Un dat allens mit veel Wulken un af un to ok Regen.
