De Grönen in Hamborg stimmt vundaag över den Koalitschoonsverdrag mit de SPD af. An'n Sünnavend harrn de Sozialdemokraten op en Parteidag eenhellig "Jo" to de Nee-Oplaag vun root-gröön seggt. Börgermester Peter Tschentscher hööpt, dat sik de Grönen jüst so eens sünd. Man he seggt ok: "Wi mussen uns Koalitschoonspartner ok en poor Saken afverlangen." Dat weer to't Bispeel bi'n Klimaschuul un de Migratschoonspolitik. Man dat de Grönen tostimmen doot, dat gellt as seker.
Op de Streek vun de U3 warrt vundaag boot. Twüschen Kellinghusenstraat un Schlump warrt Schienen un Schwellen nee maakt. Dor fohrt bet to'n 8. Mai Bussen statt Bahnen. Dordörch kann dat op de Streek al mal bet to 20 Minuten länger duern.
Dorför köönt de Lüüd mit de U2 wedder dörchfohren. Siet vunmorgen fohrt de Töög twüschen Mümmelmannsbarg un de Binnenstadt wedder. Meist twee Johr hebbt se an de Hollsteed Hoorner Rennbahn boot. Dor sall mal de U4 in Richt Hoorner Geest afbögen.
För bummelig 23.000 Schölers in Hamborg warrt dat eernst. Se leggt nu jemehr Afslussprövens fast. För meist 14.000 Jugendlichen staht Prövens för den Eersten Allgemenen oder Middlern Schoolafsluss an. In Düütsch, Mathe un in de Regel in Ingelsch. Morgen geiht dat denn för üm un bi 9.500 Schölers mit de Abitur-Prövens los. För de naturwetenschoplichen Facken kaamt de Fragen to't eerst Mal ut en bunnswieden Pool an Opgaven.
Noordkorea hett to't eerst Mal seggt, dat se Suldaten na Russland schickt hebbt, dat Land bi sien Angreepkrieg gegen de Ukrain Stütt to geven. Wat vun Süüdkorea to hören is, levert Noordkorea ok noch masse Munitschoon un Wapen na Russland. Dor sünd ok Kortstrekenraketen, Panzerhaubitzen un Raketensmieters mit dorbi.
Ne'en Rekord bi'n Hamborg-Marathon. De Kenianer Amos Kipruto hett de rund 42 Kilometer güstern in twee Stünnen 17 Minuten un 55 Sekunnen schafft. Allens in allen sünd dor meist 40.000 Lüüd mitlopen. Dor weern ok masse Hobbylöpers mit ünner. En 28 Johr olen Mann is knapp vör't Teel tosamenbraken. Reddenslüüd kunnen em wedder torüch in't Leven halen. He warrt in't Krankenhuus behannelt.
In'n Gazastremel droht en dramaatsche Hungersnoot. Siet bummelig 60 Daag lett Israel keen Levensmiddels mehr na dat Flach an de Küst. Hölpsorganisatschonen wohrschaut vör Ünnerernähren, sünnerlich bi Kinner. Vele Suppenköken mussen al dicht maken. Minschenrechtlers hollt Israel en bewusst Uthungern vun de Minschen vör.
Wat uns dor vundaag so schöön anlacht, dat is de Sünn. De maakt dat ok mit bet to 22 Graad muckelig warm. Dorto kümmt denn ok mal en mauen Wind ut Süüdoost bet West.
Un wieldat so schöön is, gifft dat datsülvige morgen jüst nochmal.
