CDU, CSU un SPD – all dree Parteien hebbt Ja seggt to den Koalitschoonsverdrag. Un vundaag nu warrt düsse ünnerschreven. De Böversten vun’e SPD hebbt hüüt fröh al künnig maakt, wokeen vun jüm een vun de Ministerposten in de ne’e Bunnsregeren afkriegen deit. Bärbel Bas schall Arbeitsministersch warrn. Stefanie Hubig, de in Rhienland-Palz betto Bildungsministersch is, de warrt de ne’e Justizministersch. Un Carsten Schneider warrt Ümweltminister.
Noch sünd se dor, aver de lütten sülvern Müllcontainers in de Hamborger S-Bahn-Töög schüllt nu so na un na afboot warrn. So as NDR 90,3 dat wies worrn is, köönt Fohrgäst jümehren Affall denn blots noch an’e Bahnhööv loswarrn. Bet Anfang vun dat tokamen Johr sünd denn all de lütten Müllcontainers in’e S-Bahnen vun de öllere Boreeg verswunnen. So is dat tominnst vun’e Bahn to hören. En Sprekersch sä, dat, wat se beleevt harrn, dat wies: de Müll in‘e Töög wörr in düsse Fäll, wo de Containers denn nich mehr dor weren, ok nich mehr warrn.
De amerikaan’sche Filmindustrie starvt bannig gau. Dat sä Donald Trump. De US-Präsident will deswegen ok, dat dat ne’e Töll geven deit dütmal op Filmen, de in’t Butenland maakt worrn sünd. Düsse ne’en Töll schüllt denn hunnert Perzent bedregen. Bavento will Trump dat fröhere Kaschott Alcatraz wedder in Bedriev nehmen un dor in’e Tokumst Swoorverbrekers ünnerbringen. Dat bekannte Kaschotteiland liggt vör San Francisco un is al 1963 dichtmaakt worrn. Hüttodaags maakt de Lüüd dor geern Utflöög hen.
Fief vun de Top-Solisten vun dat Hamborg Ballett hebbt al künnigt. Un nu warrt de ne’e Ballettintendant Demis Volpi ümmer duller bekrittelt. Mehr as twintig ann’re Dänzers vun dat weltbekannte Ensemble hebbt nu en Brandbreev an Kultursenater Carsten Brosda schreven. Se föhlt vun sik nich noog afverlangt un föhlt sik ok nich noog acht. Bavento weer dat Niveau daalgahn. De Dänzers klaagt ok över en slechte Kommunikatschoon un de Transparenz wörr ok fehlen.
Se hebbt dat mal wedder henkregen: De Footballspelers vun den FC Bayern München sünd Düütsche Meister. Düssen Titel kann jüm nu nüms mehr nehmen. Dat liggt an Leverkusen dicht achter jüm. Denn de hebbt in Freeborg blots liekop speelt – mit twee to twee. Wat mit de Hamborger Verenen is, dat is noch nich ganz rut. Dat warrt een woll eerst tokamen Wekenenn wies, wat St. Pauli in’e Eerste Liga blieven un wat de HSV opstiegen deit.
Vundaag kriegt wi son Mix ut Sünn un Wulken. Hier un dor kann dat ok mal ’n beten wat regen, meisttiets blifft dat aver dröög. Un de Temperaturen kaamt vundaag nich veel wat över veerteihn Graad henweg. Opstunns sünd dat söven Graad in’e Havencity (Kl. 9:30). De Utsichten: Morgen kriegt wi de Sünn denn noch ‘n Tick weniger to sehn as vundaag, sünd dorför ’n poor mehr Wulken to Gang, liekers geiht de Schangs op Regen aver trüchut bi Temperaturen morgen vun bet to sössteihn Graad.
Nadem de AfD as seker rechtsextremist‘sch inoornt worrn is, kümmt Kritik vun de Trump-Regeren. Beid – de US-Butenminister Marco Rubio un ok Viez-Präsident JD Vance, de seggt op de Plattform X, dat weer en polit’schen Besluss. Dat Utwartige Amt, dat wiest dat kloor torüch. De Verfatensschuul, de hett det Saak nipp un nau un unafhängig ünnersöcht to’n Schuul vun de Verfaten un de Rechtsstaatlichkeit.
