Vundaag schall Peter Tschentscher in't Hamborger Raathuus wedder to'n Eersten Börgermeester wählt warrn. He bruukt eenunsüsstig Stimmen. Sien SPD un de Partners vun de Grönen hefft tosamen söventig Aforndte. De Wahl is man geheem. Wenn Tschentscher nog Stimmen kriggt, denn kann he achterher de Senaters beropen. De ne'e Senat mutt denn noch sien Okay vun de Börgerschop kriegen.
Graad eerst in't Amt geiht de ne'e Bunnskanzler Friedrich Merz gliek al op Reis. He besöcht nu direkt de Regieren in Frankriek un in Polen. Güstern Avend hett sien ne't Bunnskabinett al wat anstött. Dat ne'e Digitalministerium schall mit süss anner Ministerien enger tosamenarbeiden as plaant. Op düssen Weg schall Düütschland gau digitaler warrn, heet dat vun de Regieren.
Mehr as twintig Dode un dreiundörtig Verletzte hefft de Ämter in Pakistan tellt. Dat weer de Folg vun Angrepen ut Indien. De Luftwapen vun Indien hett Attacken op dat Naverland flogen. De Inders seen, angrepen harrn se dor Extremisten. Twüschen Indien un Pakistan gifft dat al en poor Daag lang wedder Attacken. Achtergrund is en Anslag in de Region Kaschmir.
För Hamborg gifft dat nu Tahlen to de ne'e Grundstüer. Üm un bi föfftig Perzent vun de, de Immobilien hefft, müssen dör de ne'n Regeln mehr betahlen – dat schrifft de Finanzbehöörd. NDR 90,3 kunn in de Tahlen al rinkieken. Dor steiht denn ok: Bummlig föfftig Perzent vun de Lüüd betahlen weniger. Tosamentellt warrt Hamborg düt Johr woll üm un bi so veel Innahmen ut de Grundstüer hebben as för de Reform – dat sä Finanzsenater Andreas Dressel. In'n Rest vun Düütschland süht de Saak man anners ut. De Verband Huus un Grund seggt, dat bummelig achtig Perzent vun de Lüüd mehr Grundstüer betahlen as för de Reform.
In Rothenborgsoort warrt en ne't Kommunalhuus boot. Drei Johr schall dat duern – twüschen Elvpark Aantenwarder un de Elvbrüchen. De Vörslag, de sik dörsett hett, is en Huus ut Glas mit Dachgoorn. Dor schall denn en Café rin, man ok Warksteden för Fohrrööd un Hult – un dorto Ruum för Sport un Kultur. Dat ole Stadtdeelzentrum in Rothenborgoort is dalreten worrn.
In Hamborg is en Beropensperzess üm'n Doot vun en Fro dör Kohlenmonoxid losgahn. Dat geiht üm'n Fall vun en achtuntwintig Johr ole Fro, de vör dreiunhalf Johr an'n Rodenboom ümkamen weer. Twee Handwarkers harrn dor an ehr Gas-Therme arbeid. In'n eersten Perzess hett dat Amtsgericht de twee freisproken. Denn, so dat Gericht, dat harr an en technischen Defekt legen. De Staatsafkaatschop un de, de blangenbi klaagt, sünd denn in Beropen gahn.
Dat Wedder vundaag weet nich so recht, wat dat will. Sünn is dor – man dor treckt ok jümmer wedder Wulken an vörbi. Dat blifft mehrstendeels dröög – man dat mach ok ween, dat dat an'n Namiddag en lütt beten regent. De Temperaturen klattert op bet to söventeihn Graad. Morgen denn jüst dat Glieke noch mal: Sünn un Wulken, mehrstendeels dröög.
