De Polizei will gegen den Drogensmuggel in'n Hamborger Haven mit en ne'e Kampagne gegenangahn, un se richt sik an Lüüd, de dor in'n Haven arbeiden doot. De kriegt männichmal för jem ehr Insider-Weten veel Geld vun Drogenbanden anbaden. De Polizei wohrschaut dorvör, op sowat intogahn. Later warrt de Lüüd un de ehr Familien nämmich geern mal bedroht. Ok en Internet-Portal warrt nu freeschalt', wo een dat anonym mellen kann, wenn Drogenbanden versöökt, Havenlüüd antowarven.
Groot-Insatz vun de Polizei kort vör Middernacht in Eimsbüttel: Tügen harrn höört, dat bi de Krüüzung Schulterblatt/Eimsbüttler Straße schaten worrn is. Dree Löcker dorvun hett de Polizei denn bi dat Restaurant Amare in de Finstern funnen, un dorvör hebbt Patronenhülsen legen. Minschen sünd aver nich to Schaden kamen. Mehr as 20 Peterwagens weern in'n Insatz. De Polizei geiht dorvun ut, dat ut en vörbifohren Auto schaten worrn is - vun wokeen, dat is noch unkloor. Nu is de Kripo an't Ermiddeln.
De Hamborger Polizei maakt sik praat för de Mai-Demonstratschonen, un veer dorvun behullt se besünners in't Oog. De eerste is hüüt Avend vunaf Klock halvig acht vör de Rode Flora in't Schanzenviertel, mit sowat bi 500 Lüüd. De wüllt op Gewalt gegen Froons opmerksom maken. De Polizei rekent mit bet to 200 Personen ut dat links-extremistische Spektrum. Överto stellt sik de Polizei för hüüt Avend ok op spontane Versammlungen in.
Bi de Elbkinder-Kitas warrt hüüt streikt - un wo lang dat duern schall, weet man nich. De Lüüd för't Reinmaken un för de Köök sünd dorto vun de Gewarkschop ver.di opropen worrn. De stäädtsche Bedriever seggt aver: De Kinner kriegt liekers Eten vun externe Caterers. Blots poor vun de Öllern mööt jem ehr Kinner wat to eten mitgeven, un se sünd doröver informeert worrn. Ver.di smitt de Elbkinder-Kitas vör, se wörrn dat Personal in de Köök un för't Reinmaken blots mit Dumping-Löhn afspiesen - noch ünner den Minnstlohn, de in't Reinmaker-Gewarv betahlt warrn mutt.
Reddungs-Insatz för Polizei un Füerwehr an'n Jungfernstieg: Dor is in de Nacht en besapenen jungen Mann vun'n Alsteranlegger ut in de Binnenalster rinfullen. Tügen kunnen em ut dat Water ruttrecken, ehrdat de Reddungslüüd dor weern. De Mann weer beten wat ünnerköhlt un keem na't Krankenhuus hen.
De Dag bringt veel Sünnschien mit Hellblau wegen Sahara-Stoff, un bet to 24 Graad – nu (Klock negen) sünd dat in Hammerbrook 14 Graad. Un morgen, dor blifft dat so.
Hart Dörchgriepen gegen Straafdäters op Islamisten-Demos – Bunnsbinnenministersch Nancy Faeser seggt, dat schüllt de Sekerheitsbehörden vun de Länners doon. Wokeen dat Kalifat wull, de is in Düütschland nich richtig, dat hett se op de Plattform X schreven. Achtergrund is en Demo vörgüstern in St. Georg. Mehr as 1.000 Minschen weren tosamen kamen, üm gegen en Poltik to protesteren, de - wat se menen - gegen den Islam weer. De Veranstalter steiht dicht bi de Grupp „Muslim Interaktiv“. Se warrt vun den Verfatensschutz as seker extremistisch inornt.