De Weertschop in Düütschland löppt 'n beten flau - un dat kriggt een nu ok to marken op den Hamborger Arbeitsmarkt. To'n eersten Maal siet Johren geiht de Tahl an Lehrsteden torüch. De Hannelskamer seggt, dat de Ünnernehmens sik mit dat Utbillen vun junge Lüüd torüchhollen doot, wegen de Kosten dorför. De Düütsche Gewarkschopsbund verlangt, dor müss nu en Geldpott anleggt warrn, wo dejenigen Ünnernehmens inbetahlt, de nüms utbillen wüllt. De tostännige Soziaalbehöörd aver, de will lever, dat Bedrieven mit Lehrjungs oder -deerns beter stellt warrt.
Gifft dat en Tosamenhang twüschen den Schööt op St. Pauli un en Explosion in de Hein-Hoyer-Straat? De Hamborger Polizei ünnersöcht dat nu. Dat is beid Sünnavend passeert, un dat Fahnden löppt nu na en 35-johrigen Mann, de bi de Polizei al bekannt is. Dat Hamborger Abendblatt mellt, dor achter steken kunn en Striet in't Rockermilieu.
Woans kann een sik in't Internet mööglichst vele Kunnen un Followers angeln? Dat is en zentrale Fraag bi de Mess OMR, de vundag in Hamborg losgeiht. Disse Mess üm dat Online Marketing warrt in de Messehallen woll vun teihndusende Lüüd besöcht. Un blots twee-eenhalf Kilometers dorvun weg, in dat Maritime Museum, dor is ok wat los: de Düütsche Schippfohrtsdag. Themen sünd hier dat Schützen vun't Klima op hoge See un dat Oppassen op de Seeweeg.
De Lüüd in Düütschland betahlt jümmer fakener un jümmer mehr mit de Koort. Dat wiest en ne'e Studie vun en Kölner Institut, wat den Hannel erforschen deit. De Studie seggt, bi de Betahlvörgäng in Ladens leeg de Andeel vun Koort un Handy nu bi 44 Perzent - dat heet, de hett sik in de verleden fief Johr verduppelt.
Sik goot an den Klimawannel anpassen - dat will de Bezirk Eimsbüddel un hett dorför en egnet Konzept opstellt. Ünner annern schall dat mehr Plätz to'n Sitten in'n Schadden geven. Op de Speelplätz wüllt se ünnersöken, wo goot de Boddens un de Speelgereden mit de Hitt kloorkaamt. Un denn kunn dat in Eimsbüddel villicht ok hier un dor Spenners geven, wo een sik Sünnmelk oder Drinkwater rutpumpen kann. Tokamen Week will de Ümweltutschuss över dat Konzept Raat slaan.
Eerst is de Heven dichttrocken, man later lockert dat op un ok de Sünn wiest sik noch – bi bet to 16 Graad. Nu (Klock negen) sünd dat in Kirchwarder 7 Graad. Ok morgen blifft dat gröttstendeels dröög, mit mehr Wulken as Sünnschien un bet to 17 Graad.
CDU, CSU un SPD – all dree Parteien hebbt Ja seggt to den Koalitschoonsverdrag. Un vundaag nu warrt düsse ünnerschreven. De Böversten vun’e SPD hebbt hüüt fröh al künnig maakt, wokeen vun jüm een vun de Ministerposten in de ne’e Bunnsregeren afkriegen deit. Bärbel Bas schall Arbeitsministersch warrn. Stefanie Hubig, de in Rhienland-Palz betto Bildungsministersch is, de warrt de ne’e Justizministersch. Un Carsten Schneider warrt Ümweltminister.
