Nadem dat in‘n Libanon ne ganze Reeg an sonöömte Pagers geven hett, de in’e Luft flagen sünd (dat sünd lütte Reedschopen för de Kommunikatschoon), dor sünd dat güstern nu en ganzen Barg an Walkie Talkies ween, bi de dat glieke passeert is. Snackt warrt hier vun minnstens twintig Dode un mehr as veerhunnertföfftig Lüüd, de dor noch bavento bi to Schaden kamen sünd. De Anslääg schullen woll wedder Liddmaten vun de Hisbollah-Miliz drapen. Un de Hisbollah, de seggt nu, dat Israel achter düsse Saak steken dee. UN-Generalsekretär Antonio Guterres wohrschaut, dat de ganze Laag dor nu över Stüer gahn kunn.
För de Lüüd in’t Handwark, in’e Pleeg oder in’n Hannel is dat en gode Naricht: Denn se kriegt in Hamborg middewiel ahn veel Maleschen de Verlööv, utnahmswies parken to dröven. Un dormit is denn woll ok de böse Striet rund üm dat Parken vun Handwarkslüüd in de sössunsösstig Ecken vun Hamborg, wo egens blots Bewahners parken dröövt, vörbi. Denn düt Johr hebbt se in’e Amtsstuven meist all Andrääg op en Utnahm afnickt. Bi de ganze Saak mutt een blots bi weten, dat so en Andrag un Verlööv denn för jedet Auto tweehunnertföfftig Euro kösten deit.
De Stadt Hamborg will de Profi-Footballverenen HSV un St. Pauli an dat, wat de Polizeiinsätz bi Footballspelen kösten doot, an deelhebben laten. De Börgerschop hett nu güstern hierför en Initschatiev op’n Weg bröcht. Man, bet jichtenswat passeren deit, mutt een eerstmal noch en Uurdell vun dat Bunnsverfatensgericht aftöven. Denn in Bremen mutt de Bunnsligist Werder bi Risikospelen bi mitbetahlen. Man dor is eerstmal noch de Düütsche Footballliga gegenangahn un hett klaagt. Un je na dem, wat dor denn nu bi düsse Klaag bi rutsuern deit, will denn ok Hamborg kieken, wat mööglich is - un wat de Verenen denn bi Polizeiinsätz villicht bi mitbetahlen mööt.
De Dag, wo dat Westfield-Center in’e Havencity (dat ne’e Inkoops- un Beleevnisviddel in’t Överseequarteer) sien Dören apenmaken deit, warrt nu nochmal wedder verschaven. Nu warrt dor eerst vun dat tokamen Johr snackt. Oplaatst wüllt se dor bet Enn vun’n Märzmaand sowiet ween. Dat hebbt de Hüerslüüd, de dor in dat Inkoopscenter jümehr Ladens apenmaken wüllt, to NDR 90,3 seggt, dat dat stimmen dee.
De Wekenmarkten in Hamborg sliddert woll in en Kries rin. Vör allen Dingen de Markten ünner de Week warrt ümmer lütter. De Tahl vun’e Marktbeschickers geiht dor siet Johren trüch. Dor warrt vun snackt, dat sik jümehr Arbeit nich mehr lohnen dee. De Marktlüüd klaagt doröver, dat de Energie to veel kösten deit un dat de Oplagen, wat den ganzen Papeerkraam angahn deit, to hoog weern. Un dat fehlt an junge Lüüd, de dat wiedermaken wüllt. Nu warrt düt Johr de Markten an’n Maandag an’n Slump un de in Dulsbarg dichtmaakt.
Veel Larm, aggresive Lüüd un Drogenhannel: De Naverschop an’n Hansaplatz in St. Georg harr sik över en lütt Wirtshuus dor beklaagt un güstern Avend nu, hett dat dor denn en Razzia geven. Alltohoop hett de Polizei dorbi fief Straafanzeigen bi stellt. Blangen anner Saken hebbt se bi en Keerl Haschisch funnen un bi en annern bummelig teihndusend Euro in Bor.
So grau de Dag villicht ok losgahn is, de Sünn kummt eerst noch. Un mit söven beten negen Stünnen warrt dat vundaag noch ganz ornlich. Vun’e Temperaturen her sünd wi opstunns bi foffteihn Graad op’e Veddel. Mit de Sünn tohoop kummt dat vundaag aver noch op bet to veeruntwintig Graad. Un morgen maakt wi dat Ganze denn ok nochmal wedder jüst so as vundaag.
