De Havens in Europa wüllt sik beter gegen den Hannel mit Drogen schulen. Bunnsbinnenministersch Nancy Faeser hett nu na Hamborg inlaadt, üm över dat Thema Sekerheit in’n Haven to snacken. Mit dorbi sünd blangen annern Belgien, de Nedderlannen, Frankriek, Italien un Spanien. Düsse Länner wüllt in Tokumst noch beter tohooparbeiden, üm gegen den Hannel mit Drogen in Havenrebeden gegenan to gahn.
Israel hett woll de Kontroll över de palästinensische Siet vun den Grenzövergang Rafah övernahmen. Dat deel dat Militär sülvst mit. Sünnereenheiten ünnersöökt woll al de Ümgegend. De mehrsten Börgerslüüd ut dat Rebeet schüllt middewiel in Sekerheit ween. Rafah gellt as de letzte Bastion vun de Terror-Organisatschoon Hamas in den Gazastremel. To den Vörslag för en Wapenroh harr Israel vörher indirekt nee to seggt.
Na de letzte Demonstratschoon vun düsse Oort in Hamborg is in ganz Düütschland doröver snackt worrn, wat Demokratie utholen mutt. Nu wüllt Islamisten wedder dörch de Stadt trecken. För Sünnavend hett „Muslim Interaktiv“ en ne’e Demonstratschoon anmellt, de wedder in St. Georg vör sik gahn schall. De Versammelnsbehöörd vun de Polizei kickt opstünns na, wat de Demonstratschoon utricht warrn dörv, oder nich. Wat dorbi rutsuern deit, steiht noch nich fast. Verleden Mal harrn Deelnehmers en Kalifat verlangt, en islaamschen sonöömten Gottsstaat.
Ok Hamborgs Politikerlüüd warrt in den Wahlkamp deels groff angahn. Se klaagt in sozjale Medien doröver, dat op jüm schimpt un jümehr Wahlplakaten tweimaakt warrt. An’n Freedag weer in Sassen de SPD-Kandidaat för de Europawahl, Matthias Ecke, attackeert worrn un swoor an’t Lief to schaden kamen, as he jüst Wahlplakaten ophangen dee. Vunmiddag warrt de Wahlomat freeschalt.
Vulle Hallen un bet to 70.000 Besökerinnen un Besökers. In en halve Stünn fangt de Mess Online Marketing Rockstars, kott OMR, an. Twee Daag lang wiest goot 500 Ünnernehmen in de Messhallen jümehr digitalen Anbotten. En Barg bekannte Lüüd sünd ok mit dorbi, as de US-Influincerin Kim Kardashian, Tokio Hotel un Bastian Schweinsteiger. Koorten för dat Festival köst twüschen 500 un 900 Euro.
Dat geiht vöran mit de Plaans för de U5. De Hoochbahn hett den Opdrag för den tweten Bo-Afsnitt an en Ingenieur-Büro geven. Dat geiht üm en 17 Kilometer lange Tunnelstreek mit 16 Steden, wo een in- un utstiegen kann. In’n Sommer schall dat Verfohren denn losgahn, wo se de U5 mit op’n Weg bringen wüllt.
Vundaag sünd veel Wulken an’n Heven, man mehrstendeels blifft dat dröög. An’n Namiddag un Avend waagt sik denn ok de Sünn mal rut. De Temperaturen klattert op 16 bet 17 Graad. Opstünns sünd dat 13 Graad an de Bill. Morgen köönt wi uns denn wedder op veel Sünnschien freien. Bi 18 bet 20 Graad warrt dat noch wat warmer.
