Keen Opstiegsfier bi'n FC St. Pauli, man Höpen op den Opstieg bi'n HSV. So süht dat na dat Stadtduell in de twete Football-Bunnsliga ut. De HSV hett dat Heimspeel mit 1 : 0 wunnen. Robert Glatzel hett dor denn Ball rinmaakt. Dormit is för den Hamborger Spoortvereen tominnst in de Theorie en Opstieg mööglich. Man in de tokamen Week kann de FC St. Pauli dat na de erste Liga hen schaffen.
De Polizei Hamborg kann opaten. Na dat Stadtduell is nix grötters passeert. Man de HSV-Fans hebbt na dat Speel en Füer in't Stadion maakt. Twee Fruunsminschen hebbt Rookvergiftens un Verbrennens afkregen. Bi dat Derby weern 1.900 Polizeilüüd in'n Insatz. Dor weern ok 600 Beamten ut Bremen, Neddersassen, Sleswig-Holsteen, Bayern un vun de Bunnspolizei mit dorbi.
Dor weern masse Lüüd in Brass, as vör een Week Islamisten dörch de Binnenstadt in Hamborg trocken sünd. Vundaag warrt dorop antert. En Bündnis vun Parteien un Vereenen will gegen Islamismus un för Freeheit un Demokratie op de Straat gahn. Un twoors an den sülvigen Oort an'n Steendamm. Se reekt dor mit bummelig eendusend Lüüd.
Siet güstern steiht fast: Russland hett sik vör knapp annerthalv Johr in de Systemen vun de SPD hackt. Nu wohrschaut dat Bunnsamt, dat is en Angreep op uns Demokratie.Man Präsidentsche Claudia Plattner sä in de Tagesthemen, Düütschland weer nich ganz ahn Schuul utlevert. Nu mööt de Systemen op den ne'esten Stand un de IT op Steed bröcht warrn.
De Handballers vun'n HSV Hamborg mööt opstunns nich blots spoortlich op't Feld kämpen. Se ringt ok üm de Lizenz för de Bunnsliga in de tokamen Saison. De Handball-Bunnsliga hett den HSV Hamborg de Lizenz verseggt, wieldat de Kass nich stimmen deit. De Liga meent, de Club hett dat Lock, wat dor binnen is nich stoppt. De HSV Hamborg hett dor Inspruch gegen inleggt.
Trumpeten, Schuuvtrumpeten un Tuben - Hamborg klingt an düt Wekeneen en Stück wat anners. Güstern is de Düütsche Evangeelsche Posunendag losgahn. 15.000 Minschen weern glieks to Anfang bi'n Gottsdeenst op de Moorwisch an'n Dammtor. An't Wekenenn gifft dat nu masse Kunzerten. To't Bispeel in Inkoopzentren, Kranken- un Olenhüüs. To de Serenaad op de Jan-Fedderr-Promenaad reekt se vunavend mit poor dusend Musikers.
Ganz so warm as de verleden Daag is dat leider nich mehr. Man op bet to 20 Graad schafft de Temperaturen dat liekers noch. Un blangen masse Wulken kickt denn ok de Sünn rut. Eerst to’n Avend hen, kann ok mal wat Natts vun baven kamen.
Morgen is denn en goden Dag, sik üm den Huusholt to kümmern. Dor pladdert dat jümmer wedder mal bi blots noch bet to 17 Graad.