In’n Blohms Park in Hoorn is schaten worrn. Twee Keerls sünd dor güstern Avend swoor wat bi to Schaden kamen. So as dat utsüht, hebbt dor woll vörher twee Gruppen Mannslüüd dull wat mit’nanner streden hatt. Un achteran is denn schaten worrn. As de Schandarms dor henkamen sünd, harrn se de beiden versehrten Lüüd funnen. Un beide sünd se na’t Krankenhuus henbröcht worrn. Na de Däders warrt noch na söcht. Bet wiet in’n Avend rin, hebbt se dor noch na Sporen keken un egens dorför in’n Park goors en Lichtpahl opstellt hatt.
Dusende Lüüd sünd güstern al bi’n Havengeboortsdag mit bi ween. Un vundaag nu geiht dat gröttste Havenfest, wat dat op’e Welt geven deit, wieder. Dorbi köönt kloor vundaag ok wedder Scheep bekeken warrn. Un allerbest warrt dat denn hüüt Avend. Dor gifft dat denn dat grote Füerwark un op’e anner Siet maakt denn de Band "Scooter" op en grote Bühn, de op’t Water swümmen deit, Musik.
De USA blievt dorbi: Se wüllt keen Wapen levern för de israeelsche Offensiev in Rafah. Dor hebbt mehr as een Million Palästinenserlüüd Schuul söcht. De Ministerpresident vun Israel, Benjamin Netanjahu, de sä nu in en Videonaricht, dat sien Land to Noot ok alleen gegen de Hamas in’n Gazastriepen gegenangahn dee.
Een Dag noch – morgen – dor geiht dat denn in Malmö in Sweden mit dat Finaal vun’n ESC, den Eurovision Song Contest, los. Un güstern bi dat twete Halffinaal hett dat dull wat grummelt hatt in’e Stadt. So as de Polizei dat seggt, sünd in’e Binnenstadt vun Malmö bet to twölfdusend Lüüd op’e Straat gahn. Se güngen gegen den Bidrag vun Israel gegenan. Achtergrund is dat Vörgahn vun Israel in’n Gazastriepen. Bi den Musikwettstriet is de Sängersch Eden Golan ut Israel aver liekers wählt worrn un maakt nu bi’t Finaal mit.
"Ik veruurdeel den afscheulichen Angreep" – dat sä Hamborgs Twete Börgermeistersch Katharina Fegebank över en woll antisemitische Attack an’e Uni Hamborg. Denn dor is bi en Vörlesen över Antisemitismus Middewekenavend en sössunföfftig Johr ole Fro, de de Veranstalten mit op’e Been stellt harr, slaan worrn un bi to Schaden kamen. Se kööm achteran na’t Krankenhuus hen. Fegebank sä, Gewalt dröff nie nich en Middel bi en Ut’nannersetten ween.
Un dat is wiederhen ganz schick: veel Sünn un kuum Wulken. Na un na treckt denn doch ’n poor Wulken dör, de laat denn aver ümmer noch noog Platz för de Sünn. Un: Dat blifft dröög bi Temperaturen vun bet to eenuntwintig Graad. Opstunns sünd dat al dörteihn Graad in Stellingen (Kl. 9:30). Un morgen süht dat Wedder meist jüst so ut as vundaag.
Nu is vördag kamen, dat ok noch op anner Politikerlüüd welk op daalgahn sünd. De Weertschopssenatersch vun Berlin, Franziska Giffey, de hett bi en Attack licht wat an’n Kopp bi afkregen. So as de Polizei dat seggt, hett en Keerl de SPD-Politikersch in en Bökeree angrepen un dat mit en Büddel, wo wat Harts binnen ween hebben schall. Un in Dresden is en Grönen-Politikersch bi dat Opkleven vun Plakaten beschimpt un anspeet worrn vun een Keerl un een Fro, gegen de se nu vörgahn doot.