Wat den Nögen Oosten angahn deit, is nu de Fraag, wat de Krieg dor nich villicht grötter warrn deit? Dor tominnst wohrschaut de Verenten Natschonen vör. Denn güstern sünd dor in’n Libanon mitmal en ganzen Barg Pagers in’e Luft gahn. Dat sünd lütte Reedschopen, wo een sik mit’nanner schrieven un mit uttuschen kann. Negen Lüüd sünd dor woll bi düsse Explosionen bi to Dode un meist dreedusend op anner Oort un Wies bi to Schaden kamen. To düsse Lüüd höört ok ne ganze Reeg Liddmaten vun de Terrorgrupp Hisbollah mit to. De New York Times schrifft, dat de Hisbollah düsse Reedschopen woll in Taiwan bestellt hett. Un dat kunn woll ween, dat Agenten ut Israel düsse denn villicht affungen un dor an rümbastelt harrn. Israel sülvst hett dor to de ganze Saak bet nu aver noch nix to seggt.
Dat Hoochwater an’e Elv kummt nu ümmer wieder in Richt na Noorden hen. In Dresden staht se al kort vör de neegste Alarmstuff. Man in Hamborg warrt een dat ok’n Stück wiet positiv marken, denn dat ganze Water spöölt ok den Slick ut’e Elv na de Noordsee hen rut. Un dat gifft denn de Havenverwalten HPA ’n beten wat mehr an Luft. Denn de mutt den Slick ja sünst anners wedder utbaggern. För de Noord- un Oostsee kunn dat aver op lange Sicht nich unbedingt goot för ween. Denn dor kunn mit dat vele Water denn ok giften Kraam henkamen.
Bi de Hamborger Waterschuulpolizei wüllt se woll ’n beten wat ümboen un anners maken. So as dat utsüht, warrt dat Kommissariat in Waltershoff woll mit de Steed in Steenwarder tohoopleggt. Un de Butensteed an’e Lannensbrüchen warrt ganz un gor dichtmaakt. Dat sä nu en Sprekersch vun’e Polizei to dat NDR Hamborg Journal, dat dat stimmen dee. Dorna to uurdelen mutt de Personaalraat dat Ganze aver noch afnicken. Man de Düütsche Polizeiwarkschop sä al, dat se dor gegen den Ümbo gegenangahn wullen.
De Schadens an de Noorderelvbrüch sünd nich ganz so dull as een dor egens eerst för bang ween ist. De Elvqueren vun’e A1 is deswegen denn af nu ok wedder ganz un gor freegeven. Un dat gellt ok för Swoortransporten, de över veertig Tünnen wegen doot. Statiker un Metall-Fachlüüd hebbt nu faststellt, dat de lütten Reten an’e Pielers vun’e Brüch blots buten bavenop sünd un sik nich dör den ganzen Stahl trecken doot. Nu warrt noch en Steeg ünner de Brüch boot, so dat se dor denn ok to jede Tiet den Stahl ünnersöken köönt.
Musikfans freit sik al: Denn hüüt Avend geiht dat in in Hamborg mit dat Reeperbahnfestival los. In de tokamen veer Daag treedt dor denn bummelig veerhunnertföfftig ünnerscheedlich Muskanten in’e Clubs op St. Pauli op. Offizjell losgahn deit dat hüüt Avend Klock söss in dat Operettenhuus an’n Speelbudenplatz.
De Dag vundaag geiht meist jüst so los as güstern. Na un na kummt de Sünn ümmer ’n beten wat mehr rut un denn warrt de Dag schöön un warm. An’n Enn warrt wi denn so bi üm un bi acht bet teihn Stünnen Sünn op unsen Zeddel för vundaag stahn hebben. Dat blifft dröög bi bet to veeruntwintig Graad. Opstunns sünd dat föffteihn Graad in Eimsbüddel. Un morgen maakt wi dat Ganze denn noch mal so as vundaag.
Hamborg kickt bi uns in’e Stadt op negenteihn Ecken, wat een dor nich villicht grote Windrööd henboen kann. De Halven hiervun liegt in Bardörp, annere in Marmsdörp, Sülldörp un in Rohlsteed. De Bund verlangt vun Hamborg, hier Flachen för de Windkraft uttowiesen, de tweemal so groot sünd as de Butenalster dat is. Güstern sünd düsse nu dat eerste mal vörstellt worrn. Bummelig 150 Lüüd sünd mit bi ween un hebbt sik dat dor anhöört un ankeken. Üm de Anwahners dat ganze Projekt smackhaft to maken, will de Senaat jüm oder jümehren Stadtdeel an den Profit, de de Windkraft denn afsmieten deit, an deelhebben laten.
