Nu is vördag kamen, dat ok noch op anner Politikerlüüd welk op daalgahn sünd. De Weertschopssenatersch vun Berlin, Franziska Giffey, de hett bi en Attack licht wat an’n Kopp bi afkregen. So as de Polizei dat seggt, hett en Keerl de SPD-Politikersch in en Bökeree angrepen un dat mit en Büddel, wo wat Harts binnen ween hebben schall. Un in Dresden is en Grönen-Politikersch bi dat Opkleven vun Plakaten beschimpt un anspeet worrn vun een Keerl un een Fro, gegen de se nu vörgahn doot.
Al vördem een vun düsse beiden ne’en Gewaltsaken weten hett, hebbt al de Binnenminsters doröver snackt hatt, woans een de Lüüd beter schulen kann, de in’e Politik sünd oder de bi’n Wahlkamp hölpen doot. Se wüllt nu nakieken, wat een dat Straafrecht in düsse Saak wat scharper maken kann. Ok Hamborgs Binnensenater Andy Grote is dorför. In’n Snack mit NDR 90,3 is de SPD-Politiker aver nich ganz so övertüügt dorvun, wat dat alleen ok utreken deit. Grote sä, dat ok in Hamborg de Lüüd vertellt, de bi de Wahl hölpen doot, dat jüm en teemliche Aggression in’e Mööt kummt.
In Hamborg verleert Hüüs un Wahnungen bannig dull an Weert. Un dat gellt ok för den Weert blots vun Land. Dat Ganze suert dorbi rut, wenn een sik all de Verdrääg ankieken deit, wo in Hamborg en Immobilje bi verköfft worrn is. Dorna to uurdelen sünd Hüüs üm föffteihn Perzent wat billiger worrn. Un bi Wahnungen, de een sülvst tohören doot, dor is de Weert üm dörteihn Perzent wat na ünnen gahn.
Egens schull vundaag de Rentenrefoorm afnickt warrn. De Bunnsregeren verschufft dat nu aver op en latere Tiet düssen Maand. Dat verkloor Bunnskanzler Olaf Scholz vun’e SPD güstern Avend. Vörher harr he sik mit Viezkanzler Robert Habeck vun’e Grönen un mit Finanzminister Christian Lindner vun’e FDP drapen. Man Soziaalverbänn wiest dor nu dull wat op hen, dat een dat Rentenpaket noch vör de Sommerpaus op’n Weg bringen mutt. Un dat een dat Ganze nich in‘n Striet, wo dat üm de Staatskass gahn deit, bi tweirieten dröff.
Huusdokters warvt vundaag för sik sülvst: In ganz Düütschland laadt se in to den eersten bunnswieden Dag - den "Dag vun’e Huusdokter-Medizin". In Hamborg dreiht sik dat an düssen Akschoonsdag vör allen Dingen dorüm, dat Afornten ut’e Börgerschop na de Huusdokters henkamen doot. Se wüllt sik dor denn en Bild maken vun den Alldag in en Praxis.
Morgen is Fierdag. Un dordör hebbt denn veel Lüüd en laang Wekenenn un wüllt verreisen. Un deswegen rekent de ADAC vundaag ok dormit, dat een op de Straten denn veel wat töven mutt. Vör allen Dingen in Hamborg un Sleswig-Holsteen warrt sik dat denn woll rund üm den Elvtunnel veel wat op de A7 stauen un woll ok op de A1 na Fehmarn hen.
Vundaag schient den ganzen Dag över de Sünn. Hier un dor is ok mal de een oder anner Wulk to sehn. De maakt aver nix, denn de is blots Deko. Un de Temperaturen stiegt vundaag noch op bet to twintig Graad. Opstunns sünd dat in Billsteed al acht Graad (Kl. 9:30). Morgen kriegt wi de Sünn denn nich ganz so veel wat to sehn as vundaag. Sünd aver ümmer noch ganze acht bet negen Stünnen. Meisttiets blifft dat aver dröög bi Temperaturen ok dor vun üm un bi twintig Graad.