De Warkschop GDL will, dat dat Bahnpersonal in'n noorddüütschen Regionalverkehr beter bewohrt warrt. De Lüüd vun de Bahn vertellen jümmer wedder vun Angrepen. Se müssen utbaden, wenn Töög to laat kaamt or Ümwegen föhrern mööt. De Warkschop harr ok geern en Alkoholverbott – so as dat dat ok al bi'n HVV un in'n Metronom gifft.
Vun vundaag af an warrt in Hamborg wedder över Extremwedder snackt. Dat is dat veerteihnst Mal, dat dat so en Kongress gifft. Sövenhunnert Fachlüüd beradt över dat, wat se nee rutfunnen hefft: in de Meteorologie, Klimawetenschop, Stadtplanen, Medizin un Weertschop. An de drei Kongressdaag gifft dat Workshops. To'n Bispeel to Starkregen, Schuul vör Hitt un wat dat köst, wenn de Eer jümmer warmer warrt.
Russland spionert mehr in Noord- un Oostsee. Scheep ut Russland, de egens för't Forschen dor sünd, hefft woll Windparks, Datenkabels un Gas-Pipelines utspioneert. Dat hett en Grupp vun Journalisten rutfunnen: ok welk vun NDR, WDR un SZ weren mit dorbi. Se hefft mehr as eendusend Morse-Narichten vun de Scheep rutslötelt. Un se sünd de Scheep deelwies ok achterher föhrt un hefft mit Lüüd snackt, de op de Scheep anhüert weren.
In'n Libanon sünd Teihndusende Minschen op de Flucht vör Angrepen ut Israel. De Angrepen op de Hisbollah-Miliz güngen in de Nacht wieder. Vun de Libanesen heet dat, dat dorbi wedder en hogen Kommandeur vun de Hisbollah ümkamen is. In de Krankenhüüs liggt man ok veele Kinner.
Se hefft Messen, Latten un Fleeschkloppers dorbi hat: Op'n Raathuusmarkt sünd föfftig Hooligans ut Italien opfallen. Wegen de Fans vun Lazio Rom müss de Polizei mit veel Lüüd anrücken. De Mannslüüd wullen denn utneihen – de Beamten hefft se man noch kregen. All föfftig sünd nu in'n Polizei-Oppass. De Hooligans ut Rom sünd wegen en Speel gegen Dynamo Kiew in de Football-Europa-League hier. Kiew speelt wegen'n Krieg in de Ukraine in Hamborg.
De Plaans för en Flüchtlingszentrum in Wandsbek sünd woll vun'n Disch. Dat Hamborger Avendblatt schrifft, dat dat to veel köst. Plaant ween is, dat en olen Komplex vun de Telekom ümboot warrn schull. Üm un bi eendusenddreihunnert Flüchtlingen schullen dor henkamen. Nu mutt de Binnenbehöörd en ne'e Steed söken. Bet dat so wiet is, warrt dat Zentrum in Meiendörp dorför bruukt.
Vundaag sünd veel Wulken an Heven – af un an regent dat ok rut. Dat denn bet to söventeihn Graad. Morgen gifft dat üm un bi dat Glieke noch mal. Later in de Week schall dat noch köler warrn.