In'n Libanon is en hogen Kommandeur vun de Hisbollah-Miliz ümkamen. Dat Ibrahim Akil doot is, sä na Israel nu ok de Hisbollah. Israel harr em in Beirut op'n Prick mit en Luftslag döödt. He schull en Attack op Israel plaant hebben – vergliekbor mit'n Angreep an'n sövten Oktober in't verleden Johr. Bi'n Luftslag weren ok noch tominnst teihn anner Kommandeurs vun de Hisbollah ümkamen. Libanons Butenminister wohrscho in'n UN-Sekerheitsraat in New York, dat de Laag in'n Negen Oosten richtig uteenannerbasten kunn.
Hamborg harr in de Weertschop giern en beteren Draht na Asien. Ut düssen Grund flüggt Börgermeester Peter Tschentscher vundaag mit en Delegatschon na Südkorea un Singapur. Snacken wüllt se dor an vörste Steed över gröne Energie un reine Havens. Ok Busan steiht op de Reislist. Dor is de gröttst Haven vun Südkorea – mit en Ümslag, dreimal so groot as in Hamborg. Tschentscher will in Busan en Haven-Kooperatschon ünnerschrieven: Dorbi geiht dat üm grön Drievstoffen för Scheep – so as Methanol un Waterstoff.
Per Dag kaamt jümmer noch twüschen dörtig un föfftig Flüchtlingen in Hamborg an. In'n Juli weren dat üm un bi eendusendveerhunnert – bummelig dreihunnert weniger as noch in'n verleden Juli. So sünd de Tahlen in Sommer doch nich na boven gahn – so as dat mal annahmen worrn is. Dat leeg an dat, wat de Bund maakt, üm de Migratschon to stüern, sä de Sotschalbehörd to de dpa.
De Hamborger Bunnsdagsaforndte Katharina Beck vun de Grönen will wedder Spitzenkandidaatsche warrn. Dat hett se güstern bekanntmaakt. De tweeunveertig Johr ole Beck is Sprekersche för de Finanzpolitik vun de Grönen-Fraktschon in'n Bunnsdag. För drei Johr kreeg Beck mit üm un bi fiefuntwintig Perzent dat düütschlandwiet best Resultat för de Grönen in en Bunnsland. In'n November wüllt de Grönen in Hamborg över de Kandidaten för'n Bunnsdag afstimmen.
In Hamborg is en Mann bi en Wohnungsbrand an de Pinnbarger Chaussee ümkamen. De Polizei seggt, dat dat Füer an'n fröhen Avend in'n süssten Stock vun en Mehrfamilienhuus losgahn is. Hülpers harrn noch versöcht, den Mann in sien Bett to reanimeren. Man de tweeunachtig Johr Ole is noch dor dootbleven. Tosamentellt weren dörtig Füerwehrlüüd in'n Deenst.
De HSV Hamborg hett in de Handball-Bunnsliga dat eerst Mal in Saison wunnen. Bi'n Opstieger 1. VfL Potsdam kunnen sik de Hamborgers mit eenundörtig to dörtig dörsetten. Al vör't Speel geev dat för'n HSV Hamborg en gode Naricht: To't eerst Mal stünn Torwart Robin Haug in'n Kader – he weer verletzt.
Vundaag warrt dat noch mal dröög un warm – mit bet to dreiuntwintig Graad. Morgen denn üm un bi dat Sülvige: dröög un bet to dreiuntwintig Graad. In de tokamen Week warrt dat denn peu a peu köler.