Siet teihn Johr warrt Hamborg nu al vun Root-Gröön regeert - un so geiht dat woll ok in de tokamen fief Johr wieder. SPD un Gröne hebbt jümehr Koalitschoonsverhannelns afsloten. Ok över letzte Details sünd se sik noch eens worrn. De Koalitschoonsverdrag schall nu hüüt Middag vör de Börgerschopssitten in’t Raathuus vörstellt warrn. Övermorgen, dor is denn en SPD-Parteidag plaant – un tokamen Maandag, dor gifft dat denn ok en Parteidag vun’e Grönen. Bi beide Parteien mutt ok noch de Parteibasis över dat afstimmen, wat verhannelt worrn is.
Dat is woll de letzte Sitten vun’n olen Senaat: In’t Hamborger Raathuus will de CDU vundaag in en aktuelle Stünn över Grootprojekten snacken, de scheef lopen sünd. SPD un Gröne müssen düsse Projekten "endlich kloor kriegen", heet dat vöraf. Dorbi geiht dat de Christdemokraten to’n Bispeel ok üm den Uni-Neebo „Haus der Erde“. De is mit över 400 Millionen Euro mehr as dubbelt so düür worrn as plaant. Aver ok doröver, woans dat mit de Köhlbrandbrüch wiedergahn schall, will de CDU snacken.
An’t Phoenix-Center in Hamborg-Horborg schall dat wedder en grote Klopperee mit masse Lüüd geven hebben. As de Polizei seggt, hebbt sik dor güstern an’n laten Namiddag mehre junge Lüüd in´e Klatten kregen. As de Schandarms denn dor weern, sünd se afhaut. An’n Avend sünd denn noch mehre Gruppen vun junge Lüüd vun’e Polizei kontrolleert worrn. Fastsett hebbt se Nüms. De Polizei is nu mehr un mehr an’t Phoenix-Center ünnerwegens. Achtergrund is, dat dat dor in’e verleden Tiet jümmer wedder gröttere Rangeleen un Gewaltdaten geven hett.
Russland is praat för en Enn vun den Krieg in de Ukraine. Dat hett US-Präsident Donald Trump seggt. Nipp un nau sä he: “Ik glööv, wie hebbt een Deal mit Russland“. Man nu güng dat ok dorüm, en Övereenkamen mit den ukrainschen Präsidenten Selenski to finnen. Över Selenski sä Trump, dat siene Denkwies in Saken Halvinsel Krim, dat swoor maken wörr, den Krieg to en Enn to bringen. Selenski harr vörher nochmal ünnerstreken, dat he de Krim nich as Territorium vun Russland sehn un annehmen dä.
Weniger Asphalt un Beton – dorför mehr Gröön: Dat will Hamborg nu mit en ne’e digitale Plattfoorm henkriegen. De Internetsiet heet „beteilige.me“ un dor köönt Lüüd de Stadt Vörslääg maken, welke Steden in de Stadt - wat se seggt - „entsiegelt“, also för Water dörlässig maakt warrn schullen. In’n besten Fall sett de Verwalten dat denn üm. Dat geiht dorüm, Hamborg fit för den Klimawannel to maken..
Unbekannte Lüüd hebbt in Hamborg-Moorborg en Tuun twei maakt, de egens as Schuul för Amphibien dacht is. Över den Tuun is ok al veel streden worrn. An’e Bosteed to de A26 Oost schullen dormit Poggen, man ok annere Amphibien opholen warrn. In’e Nacht vun Karfreedag op Sünnavend is de Tuun op mehre hunnert Meters kaputt maakt worrn. De Hamborger Polizei hett seggt, dat dorbi en Schaden vun 100.000 Euro bi entstahn is. De Lüüd vun de Firma DEGES, de för dat Projekt tostännig sünd, seggt, dat de Tuun böswillig twei maakt worrn is. Nu geiht goors ok de Staatsschuul düssen Fall op’n Grund.
Hüüt Vörmiddag sünd noch vele Wulken ünnerwegens, later lockert dat denn aver en beten wat op un de Sünn kümmt rut bi Temperaturen vun bet to 17 Graad. Opstunns sünd dat 12 Graad in Ottensen. Morgen gifft dat denn anfangs Nevel un dagsöver wedder een Mix ut Sünn un Wulken – ok dor bi Temperaturen vun bet to 17 Grad.
