Wenn över Wiehnachten de Familie to Besöök kummt, dröfft se denn bi uns in Hamborg in en Hotel övernachten? So as NDR 90,3 wies worrn is, sett sik mit düsse Fraag jüst de Senaat ut‘nanner. So as dat in en aktuelle Vörschrift binnen steiht, sünd Reisen vun Touristen verbaden, vun Geschäftslüüd sünd de Reisen aver verlöövt. De Hotelbedrievers in Hamborg, de wüllt hier in düsse Fraag nu Kloorheit hebben, woans dat över Wiehnachten wiedergahn schall.
// Stand: 27.11.2020, Kl. 9:30
Wat de Corona-Regeln angeiht, dor hebbt mehre Bunnslänner nu al seggt, dat se in düsse Saak en anner’n Weg gahn wüllt. Berlin will, wegen de hogen Infektschoonstahlen dor, över Wiehnachten nix wedder vun de Corona-Vörschriften vun wegnehmen. Un in Sleswig-Holsteen schüllt de meisten Schölers, wat den normalen Ünnerricht angeiht, eerst an’n ölvten Januar wedder in’e Scholen sitten. In Hamborg will de Senaat vundaag seggen, woans se dat hier bi uns ümsetten wüllt, wat dor bi dat Drapen vun Bund un Länner in Saken Corona beslaten worrn is
// Stand: 27.11.2020, Kl. 9:30
In’e Twüschentiet hett dat Robert-Koch-Institut wedder de Tahl vun de ne’en Corona-Fäll künnig maakt: Vundaag sünd dat tweeuntwintigdusendachthunnert. Un dat sünd üm un bi achthunnert weniger as noch verleden Freedag. Sietdem dat mit de Pandemie losgahn is, hebbt sik al över een Million Lüüd in Düütschland mit dat Virus ansteken. Un binnen vun een Dag sünd nu noch mal wedder veerhunnertsössuntwintig Minschen hentokamen, de an’e Süük Covid negenteihn krank worrn un bi dootbleven sünd.
// Stand: 27.11.2020, Kl. 9:30
Stünnenlang hebbt se tohoopseten un snackt un nu sünd se sik enig worrn in‘e Groten Koalitschoon: Hunnertachtig Milliarden Euro – so veel Schulden schüllt dat tokamen Johr nee hentokamen. Un dat liggt kloor ok mit an den ganzen Corona-Slamassel: En groden Deel vun dat Geld is dorför dacht, de Wirtschop ünner de Arms to griepen. Un alleen vun üm un bi twee Komma söven Milliarden Euro dorvun schall Impfstoff gegen dat Corona-Virus köfft warrn.
// Stand: 27.11.2020, Kl. 9:30
Mit de Plaans, de Synagoog an’n Bornplatz in dat Grindelviddel wedder optoboen, mit de geiht dat vöran, denn dat Geld vun’n Bund dorför is nu freegeven worrn. Dat jüdische Gotteshuus is de gröttste Synagoog bi uns hier in Noorddüütschland ween. Mehr as dusend Lüüd hebbt dorbinnen Platz hatt. In de Reichspogromnacht an’n neegten November negenteihnhunnertachtundörtig hebbt de Nationalsozialisten den Bo twei maakt hatt. Tiet later is de Bo denn afreten worrn. Vundaag heet de Bornplatz vun domals Joseph-Carlebach-Platz.
// Stand: 27.11.2020, Kl. 9:30
So as dat utsüht, will de Schufa tokünftig woll ok de Konto-Utzüüg vun’e Verbrukers nakieken. NDR, WDR un de Süüddüütsche Zeitung de hebbt rutfunnen, dat se hier al de eersten Saken op’n Weg bröcht hebbt, üm an de ketteligen Daten rantokamen. Dorna to uurdelen will de Schufa allens dat, wat op dat Konto passeren deit, nakieken, üm so denn ok Lüüd to finnen, de bi Glücksspelen mitmaken doot. De tostännige Opsichtsbehöörd kickt sik de ganze Saak nu nipp un nau an. Datenschützers snackt hier vun en Horror-Szenario.
// Stand: 27.11.2020, Kl. 9:30
Dat Thermometer wiest op Finkwarder opstunns noch null Graad an – bet to söven Graad warrt dat vundaag aver noch. De Sünn verstickt sik meisttiets achter Wulken. Alltohoop lett se sik vundaag aver so üm un bi twee Stünnen lang sehn. Un an’t Wekenenn blifft dat ok meisttiets dröög, sünd aver ok veel Wulken ünnerwegens und dat bi üm un bi fief Graad.
// Stand: 27.11.2020, Kl. 9:30
