Vun Vagels un Worms

"Vun Vagels un Worms"
Dat gifft Weeken, in de ick 70 oder mehr Stünnen an arbeiden bün. Un ick mutt seggen, wat dat ni jüst de Weeken sünd, de ick an leevsten heff. In de dorsten Weeken stoh ick op, wenn dat buten noch düster is, wat eegenti överhaupt ni to mien Metabolismus passt. Vör halvi teihn, kann man mi nömli an un för sick nix frogen, op dat man 'n anstännige Antwoord hebben will.

Dat weer fröher in de School al so. Bi de annern ook. Bet de tweete Stünn rüm weer, hebbt sick Schölers un Schoolmasters jümmers blots ankeeken, as weern se ut irgendeen Frankenstein-Film överbleeven. Mit den veel’n Sand, den wi uns dor ut de Oogen schüüert hebbt, harr man regelmäßi den Strand vun Sylt retten kunnt. Overs so is dat bleeven. Veele Lüüd stoht morns op, wenn noch keen Hohn kreihn mach. Un obends kümmt se so lot no Huus, dat se denn to nix mehr Lust hebbt. So hett de een to veel Arbeit un de anner gor keen.

Ick verstoh dat ni: Fröher harr jeden Dörpsloden mang Meddag un Klock dree dicht. Un obends Klock süss weer Fierobend. Dor hebbt sick all de annern no richt'. Dor gung man even ni bet obends Klock teihn inkööpen. Wann sünd wi blots so verrückt worrn? Man seggt je jümmers noch: "De fröhe Vogel fangt de Worm." Overs he fangt even blots de Wörms, de so fröh al op de Been sünd, üm sick fangen to loten.

Hier gibt es mehr Plattdeutsch:
Podcast: Die plattdeutsche Morgenplauderei "Hör mal 'n beten to" als als kostenloses Audio-Abo für Ihren PC:
https://www.ndr.de/wellenord/podcast3096.html

Die Welt snackt Platt: Alles rund um das Thema Plattdeutsch:
https://www.ndr.de/plattdeutsch