Mest un Löpel

"Mest un Löpel"
Hi guys un Moin, Moin ut Boston. Mien Fro un ick, wi logeert ja tomeist up disse Reis in lütte Apartments, de wi övert Internet anhüürt. As wi us hier in Boston so'n beten inricht harrn, muss ick doch feststellen, dat in de Kökeneck twee Tellers, twee Tassen un twee Gobeln weern, overs Löpels un Mesten: Fehlanzeige. Hett woll use Apartment-Vörgänger mitgohn loten. Un wi wullen fröhstücken. Overs hest du al mol probeert, een superweek American Toastbrot mit harte Botter ut'n Iesschapp to besmeren - un twors mit’n Gobel? Forget it! Mussen wi an'n ersten Dag nich in een Fröhstückslokol gohn? Expensive, düür.

As mien Fro up ehr French Toast mit Pudding un Blaubeern un ick up mien American Breakfast mit Brotkartuffeln, Bratwust un braden Eier töven deen, dor heff ick mi so ganz nebenbi dat Besteck up usen Disch bekeken un faststellt, dat pass wunderbar to de beiden Gobeln in us Apartment un heff överleggt, wo ick dat herkrieg un loot de Mesten un Löpel no dat peperdüre Fröhstück in miene Büxentasch verswinnen, markt nüms, is ganz eenfach, as mi infullt, dat ja in Amerika överall disse Lo Kameras versteekt sünd, de allens uptekent, weet von de Serien in'n Fernsehn, un denn heff ick knapp de Mesten un Löpel in de Tasch un denn stoht ook al de Gendarms an'n Disch. Let's go, Sir! Dat, äh, nee, no way. Wi sünd denn in'n neegsten Supermarkt gohn un hefft dor ehrlich Besteck köfft. Ut Plastik. 10 Mesten un 10 Löpel för 10 Dollar. Bye, bit to‘n neegsten Mol.

Hier gibt es mehr Plattdeutsch:
Podcast: Die plattdeutsche Morgenplauderei "Hör mal 'n beten to" als als kostenloses Audio-Abo für Ihren PC:
https://www.ndr.de/wellenord/podcast3096.html

Die Welt snackt Platt: Alles rund um das Thema Plattdeutsch:
https://www.ndr.de/plattdeutsch