De Gaarndwarg - Gaarnpartys

Der kleine Giftzwerg aus Nachbars Garten meldet sich wieder zu Wort und stänkert rum. Und Gerrit Hoss hört einfach zu, was er zu sagen hat.

"De Gaarndwarg - Gaarnpartys"
Pssst, hier, ik bün dat wedder mal. De Gaarndwarg. Ik heff ja dat Geföhl, dat jedeen in sien Gaarn jüst dorbi is, de letzten twee Jahren optohalen: Un wenn de Gaarn ok blots Handdook-groot is. Maak nix! Ok dor ward noch en Grill opstellt un de heele Sipp un Naverschop kummt vörbi. Dor ward lacht, supen un Karaoke sungen as wenn dat keen Morgen geev.

Egal wo veel Lüüd, wo luut, ja un schietegal, woans dat achteran utsüht un wokeen dat wedder schier maakt. Dat de Mannslüüd bi't "Beer-Entsorgen" dör de Blomen pedd, de Navershund op mien inglischen Rasen na Kaninken buddelt un sien Frauchen achtern Eekboom sik den Avend nochmal dör'n Kopp gahn laat... Dat blifft denn wedder an uns Gaarn-Dwargen hangen. Un wenn Du Pech hesst, kippt Di noch so en Döösbaddel later noch de hitten Grillkohlen op de Fööt.

Wenn dat ruhig ward un al tohopen wedder ehrn Ruusch an'n Utslapen sünd, köönt wi mit Schüffel un Schuuvkarr dat Inferno wedder oprümen. Un tokamen Weekenenn geiht de Party denn wedder vun vörn los. Noch luuter, noch bunter un noch mehr Lüüd. Dat heet för uns ok noch mehr Överstünnen, bet de Gaarn denn wedder akkerat torecht mookt is.

Du, wi Dwargen, wi fiert denn lever kommodich in'n Winter ünner uns. Dor is hier in'n Gaarn endlich wedder Roh. Nu fraagst Du di, wat wi dor denn ok 'n Lütten hebbt? Du wetst woll gor nix. Oder glöövst Du etwa, se malt uns de Nesen in de Fabrik al root an?

Hier gibt es mehr Plattdeutsch:
Podcast: Die plattdeutsche Morgenplauderei "Hör mal 'n beten to" als als kostenloses Audio-Abo für Ihren PC:
https://www.ndr.de/wellenord/podcast3096.html

Die Welt snackt Platt: Alles rund um das Thema Plattdeutsch:
https://www.ndr.de/plattdeutsch