Wi snackt platt
Sonntag, 18. Dezember 2022, 08:30 bis
09:00 Uhr
Dütmal stellt wi Jo dat ne'e Wiehnachtsalbum vun'e Band Godewind vör, wi sünd in en Repaircafé to Besöök dorto höört Ji een Wiehnachtsgeschicht vun den Finkwarder Dichtersmann Rudl Kinau, un wi wiest hen op de Fernsehsennen "De Noorden op Platt".
Ne'e Wiehnachtsmusik vun'e Band Godewind
De Wiehnachtstiet, dat kann een woll so seggen, de is jümmers ok so en beten wat Godewind-Tiet – tominnst in Plattdüütschland. Siet Johrteihnten sünd Godewind vör allen in’e Vörwiehnachtstiet mit jümehr Leder in ganz Norddüütschland ünnerwegens. „Wenn es schneit“ so heet dat ne’e Album vun’e Band – un dor sünd hoochdüütsche, man ok vele plattdüütsche Leder op to finnen . Bi "Wi snackt Platt" stellt wi Jo dat ne'e Album vun de Band vör.
Henwies: Korten för dat twete Album-Release-Kunzert op den Reesehoff in Jevenstedt in Sleswig-Holsteen an'n Dünnersdag, den 22. Dezember, gifft dat op de Internetsiet vun Godewind.
To Besöök in een Repaircafè
Wenn de Fernseher, dat Fohrrad oder dat Radio mal kaputt sünd, denn is dat ja hüüttodaags so, dat de Saken eenfach mal nee köfft warrt. De olen Saken, de lannt denn faken op den Müll - ok wenn een de egens wedder heel maken kunn. Mal wat Nees to hebben, dat is för een sülvst ja faken ok schön, man op lange Sicht is dat nich goot för uns schönen Planeten. Dorüm sünd vör üm un bi dörteihn Johr in de Nederlannen de so nöömten Repair-Cafés erfunnen worrn. Ok in Pinnbarg gifft dat so een Repair-Cafe - un mit sien kaputte Klemmlamp is dor annerletz mal de Kolleeg Bernhard Koch opkrüüzt.
Henwies: Hier gifft dat mehr Informatschonen över Repaircafés in Hamborg.
Rudl Kinau vertell: Een vun de Hirten
Rudl Kinau weer een Finkwarder Jung un woll een vun de besten Geschichten-Vertellers de wi harrn. Bi "Wi snackt Platt" höört Ji em nochmal mit een vun siene wunnerbaren Wiehnachtsgeschichten. „Een vun de Hirten“ heet de Geschicht, un de is natolesen in "Mien Wihnachtsbook" vun Rudolf Kinau. Rutkamen is dat Book in'n Quickborn-Verlag, man to köpen gifft dat dat blots noch antiquaarsch.
De Tampentrekker bi't grote Wiehnachtshavenkunzert in'n Hamborger Michel
Den Shantychor "De Tampentrekker", den kennt Ji villicht: dat is de Chor de jümmers mit dorbi is bi „Inas Nacht“ mit Ina Müller in’t NDR Fernsehn un de ARD. Düt Johr, dor weern "De Tampentrekker" ok bi NDR 90,3 to beleven: bi dat grote Wiehnachtshavenkunzert in’n Hamborger Michel. De Fernsehsennen "De Noorden op Platt", de weer ok bi de Opteken vun dat Wiehnachtshavenkunzert mit dorbi un hett de Mannslüüd vun'n Chor bi jümehrn Optritt över de Schuller keken und mit jüm över jümehr Wiehnachtsbeleevnisse snackt. Een vun de Themen bi "De Noorden op Platt" an'n Sünndagmiddag vunaf Klock halvig twölf in't NDR Fernsehen. Un ok bi "Wi snackt Platt" laat wi de Jungs mal to Woort kamen.
Moderatschoon: Jan Wulf
Schlagwörter zu diesem Artikel
Plattdeutsch
