Retro-Romantik

Gerrit Hoss entdeckt den knisternden Schallplattenspieler für sich wieder. Dabei kommt ihm dann plötzlich ein immenser Nachteil in den Sinn.

Retro-Romantik
Hest Du egentlich noch en Plattenspeeler? Vinyl belevt ja siet Johren sien Renaissance. Ja wo se fröher in de Negentiger de Schallplatt verdüvelt hebbt un blots noch digital de Tokunft weer, besinnt en sik nu op dat oole knistern un wat en dor noch so verbinnen deit. To'n Bispill kommodich en oole Miles Davis-Platt hören un en schönet Glass Rotwien. Dat kannst Du mit so en tofällige Playlist un Streaming-Deenst halt nich henkregen. Du, de en oder anner Original-Uutgaav vun fröher bringt di richtig Schotter in. Dor gifft dat to'n Bispell en Beatles-Platt "Yesterday and Today". De weer toerst mit en anner Bild ruutkamen un denn wedder instellt. Dor hett en üver 100.000 €uro för kregen. Lohnt sik also mal in de oole Plattenkist to kieken.

Blots, wat Romantik angeiht, dor harr de Schallplatt ja ok so mennigeen entscheeden Nadeel. Ik kann mi dat ja blots vörstellen: Also wenn en sik denn neger kummt - mit oder ahn Rotwien - man op jeden Fall romantsche Musik op'n Plattenteller, denn müss dat ja veel gauer gahn as hüüt. Hüüt löppt de Schnulzen in Achtergrund ja stünnenlang dör. Man domols weer ja nich so veel Tiet. Also för't "Neger kamen mang twee verleevte Lüüd".
So en Platensiet, de is ja na maximal 25 Minuten üm. Tja, dor hesst Du jüst dien Hand op de Schuller leggt (Profis hebbt den ersten Blosen-Knopp op) un denn warst Du wedder ut dien söten Droom reten, wiel dat de Nadel sik böhrt.
Oder wenn dat ganz dösig leep, denn weer en Sprung in de Platt. Op't best kott vör'n ersten Kuss un denn gung dat ganze Speel nochmal vun vörn los. Op't best hesst Du dien Platten nip un nau kannt, un bi'n letzten Titel noch'n Gang toleggt.
Du, klingt ja ganz nett düsse Retro-Romantik. Man wenn Lüüd jümmers seggt: "Fröher weer allens beter". Denn schöllt se doch mal en anner Platt opleggen.

Hier gibt es mehr Plattdeutsch:
Podcast: Die plattdeutsche Morgenplauderei "Hör mal 'n beten to" als als kostenloses Audio-Abo für Ihren PC:
https://www.ndr.de/wellenord/podcast3096.html

Die Welt snackt Platt: Alles rund um das Thema Plattdeutsch:
https://www.ndr.de/plattdeutsch