Wi snackt platt
Sonntag, 19. Februar 2023, 08:30 bis
09:00 Uhr
Dütmol geiht dat vundaag blangen anner Saken üm en Nedderdüütschen Spraakatlas, den Wetenschoplers vun’e Uni Kiel rutbröcht hebbt, wi denkt nochmal an Ulf-Thomas Lesle, de an'n 8. Februor in't Öller vun 75 Johr storven is, dorto stellt wi Jo dat plattdüütsche Höörspeel "Hungern un Freten" vun Hans-Hinrich Kahrs vör (hier köönt Ji Jo dat anhören), un wi snackt mit Christiane Ehlers vun‘t Nedderdüütsch-Sekretariat mit Sitt hier bi uns in Hamborg över en wunnerbare ne’e Broschüür to’t Thema Plattdüütsch un Schiller, de en in sien Laden oder Geschäft ophangen kann, üm to wiesen: hier warrt Platt snackt!
"Wi snackt Platt"-Schiller un en ne'e Platt-Broschüür
De Bunnsraat för Nedderdüütsch, de is sowat as dat böverste Gremium, dat wi Plattdüütschen hebbt. Un de Geschäftsteed vun düssen Bunnsraat, dat is dat Nedderdüütschsekretariat mit Sitt bi uns in Hamburg. Bi "Wi snackt Platt" vertellt de Leitersch vun't Nedderdüütschsekretariat vun ehr Arbeit, vun "Wi snackt Plattdüütsch"-Schiller, de en bi sik in'n Laden oder an'e Huusdöör ophangen kann, un vun en ne'e Broschüür to't Thema Plattdüütsch, dat de Bunnsraat för Nedderdüütsch jüst tohoop mit dat Nedderdüütschsekretariat rutgeven hett. Bestellen kann een de Broschüür un ok de "Wi snackt Plattdüütschschiller" direktemang bi't Nedderdüütschsekretariat.
En Spraakatlas för dat Nedderdüütsche
Plattdüütsch leevt - un is lang noch nich doot! Un dat dat so is, dat wiest ok de groote Norddüütsche Spraakatlas, den Michael Elmentaler rutgeven hett. Michael Elmentaler is Fachmann för Nedderdütsch an’e Uni Kiel, un he un siene Mitarbeiters, de hebbt de Plattdüütsche Spraak hier bi uns in‘n Noorden mal nipp nau ünnersöcht. Andrea Ring hett Michael Elmentaler un siene Mitarbeiters besöcht un stellt Jo dat Book bi "Wi snackt Platt" vör.
To'n Gedenken an Ulf-Thomas Lesle
As Dramaturg an’t Ohnsorg Theater hett he över vele Johrn mit siene Stücken wichtige Akzenten sett. Man ok sünst hett Ulf-Thomas Lesle wat dat Plattdüütsche angeiht, een ganz bedüden Rull speelt: een Vördenker weer he, man ok en Kritiker vun de nedderdüütsche Szeen in Noorddüütschland. Nu is Ulf-Thomas Lesle an’n 8. Februor in’t Öller vun 75 Johr storven. In Friedrichstadt in Noordfreesland. Bi "Wi snackt Platt" besinnt sik Christoph Ahlers nochmal op em.
"Hungern un Freten" - Dat Plattdüütsche Hörspeel
Middeweken, den 22. Februor, is bi NDR 90,3 mal wedder Tiet för dat Plattdüütsche Hörspeel. Fief na negen an'n Avend geiht dat los. „Hungern un freten“ heet dat Stück, dat Ji dütmal höört, un de Naam seggt al, wo üm dat dor geiht. Op indrucksvulle Oort un Wies vertellt de Autor Hans-Hinrich Kahrs in sien Stück den Levens- un Leidensweg vun een junge Deern, de nich mehr richtig eten kann. Een Thema, dat bannig aktuell is. Bi "Wi snackt Platt" vertellt Jo Ilka Brückemann mehr över dat Stück.
Moderatschoon: Jan Wulf
De Leder in uns Sennen:
Op di luert - Farvenspeel
Kumm giff mi Diene Hand - Speellüüd
Min Jehann - Ina Müller
In disse Tiet - Gerrit Hoss
Hamborg - Norma
Schlagwörter zu diesem Artikel
Plattdeutsch
