Wi snackt platt
Sonntag, 22. Januar 2023, 08:30 bis
09:00 Uhr
Dütmal geiht dat bi "Wi snackt Platt" üm dat Stück "De leven Öllern", dat an'n 15. Januar in't Ohnsorg-Theater Premieer fiert hett. Denn vertellt ok noch Schauspelersch Sandra Keck dorvun, wat dat an’n 30. un 31. Januar bi Ohnsorgs to beleven gifft, un wi stellt Jo en ne’e App för dat Smartphone vör. Dor köönt Ji Jo ole Drachten ut Norddüütschland ankieken un de sogar ok sülvst mal virtuell anprobeern.
Premieer vun "De leven Öllern" in't Ohnsorg-Theater
Vun en groten Lottogewinn, dorvun dröömt de Mehrsten vun uns. Man wat passert egens mit de Lüüd, de würklich dat Glück hebbt? Un: is dat överhaupt so en grotet Glück so veel Geld to hebben? Ok dorüm dreiht sik dat in dat ne’e Stück „De leven Öllern‘ in’t Ohnsorg Theater. "Wi snackt Platt"-Reporter Gerrit Hoss weer verleden Sünndag bi de Premieer vun dat Stück mit dorbi.
VIDEO: Komödie "De leven Öllern" feiert Premiere im Ohnsorg-Theater (2 Min)
Sandra Keck mit "Kecke Utsichten" bi Ohnsorgs to beleven
"Kecke Utsichten - Prinzessinnen in'e Wesseljohren" - so heet dat Solo-Programm, mit dat de Schauspelersch Sandra Keck an'n 30. un 31. Januar op'e grote Bühn vun't Ohnsorg-Theater to beleven is. Bi "Wi snackt Platt" maakt se en beten wat Lust op düssen Avend, de ok so wat as en lütten Törn dör de Märkenwelt is un de Fraag stellt: wat is egens ut all de jungen Märken-Prinzessinnen as Sneewittchen, Aschenpuddel un Dornröösken worrn as se öller worrn sünd?
"Dressed App" - norddüütsche Drachten virtuell anprobeern
Wenn een an Drachten denkt, denn hebbt de Mehrsten vun uns woll Dirndls oder ok Ledderbüxen in’n Kopp. In’n Süden vun Düütschland, dor warrt de ok hüüt noch herstellt un ok dragen. Hier bi uns in‘n Noorden, dor süht dat mit düsse Oort vun Mood en beten wat anners ut. Man ok hier geev un gifft dat Drachten: Drachten egens för Fierdaag oder den Olldag, för Froens- oder för Mannslüüd, för Deerns un Jungs oder ok för Verlobte oder Wittfroens. Vele ünnerscheedlich Drachten geev dat fröher bi uns in’n Noorden. Man dat Probleem is: vele dorvun kann een sik hüüt gor nich mehr ankieken, wiel nüms se opbewahrt hett. In een Museum utstellen kannst se also nich.
Nu hett de Lannsbibliothek Sleswig-Holsteen aver liekers en Weg funnen, de Drachten ut Sleswig-Holsteen un Hamborg wedder för all Lüüd togänglich to maken. Mit een App för’t Smartphone! Bi "Wi snackt Platt" vertellt Jo Lina Bande mehr över de nöömte "Dressed App", de Ji överall dor, wo dat Apps gifft, daalladen köönt.
Moderatschoon: Jan Wulf
Schlagwörter zu diesem Artikel
Plattdeutsch
