Wi snackt platt
Sonntag, 25. Dezember 2022, 08:30 bis
09:00 Uhr
To'n Eersten Wiehnachtsfierdag hebbt wi lustige un ok en beten wat besinnliche Geschichten to´t Fest för Jo. Freit Jo op Geschichten vun un mit Edgar Bessen, Gerd Spiekermann, Irmgard Harder un Beate Kiupel vun't Ohnsorg-Theater.
Lütt Moses Hillige Wiehnacht
To de Wiehnachtstiet warrt hier bi uns in’n Noorden jümmers wedder geern ok Geschichten över dat Wiehnachtsfest op See vertellt. “Lütt Moses Hillige Nacht”, so heet een wunnerbare Geschicht vun Günter Siegmund. Vertellt warrt se bi uns vun den unvergeten Schauspeler vun´t Ohnsorg Theater Edgar Bessen.
Gerd Spiekermann un de Wiehnachtsmann
Gifft dat den Wiehnachtsmann oder gifft dat em nich!? För de Mehrsten vun uns is dat kloor, dat dat em gifft. Man Ji weet: Kinner, de hebbt dor so mennigmal Twiefel an. Bi "Wi snackt Platt" vertellt Gerd Spiekermann en Geschicht ut de Tiet as he noch lütt weer.
Wat rüükt dat schöön: De "Wiehnachtskokenruch"!
Dat gifft woll keen Fest, wo de Ruuch so en grote Rull speelt as an Wiehnachten. De Ruuch vun Dannengröön, vun Lichten, vun Rökermännchen un: vun´t Wiehnachtskokenbacken. Dorvun wuss ok Irmgard Harder en Geschicht to vertellen. Natolesen is de Geschicht ok in dat Book "Wedder mal Wiehnachten", dat in'n Quickborn-Verlag rutkamen is. Köpen kann een dat Book, dat Irmgard Harder schreven hett, aver blots noch antiquaarsch.
De Wiehnachtsgeschicht na den Evangelist Lukas
Kloor, to Wiehnachten wüllt wi bi "Wi snackt Platt" ok nochmal de Geschicht vun den Mann höörn, ahn den dat uns Wiehnachfest woll gar nich geven dä. Ohnsorg-Schauspelersch Beate Kiupel leest de Geschicht, woans dat lütte Jesus-Kind op’e Welt keem: de Wiehnachtsgeschicht na den Evangelist Lukas.
Wiehnachtsgottsdeenste op Platt in Groot Flottbeek un Wandsbeek
Wenn Ji Lust op een plattdüütschen Gottsdeenst, denn gifft dat an’n tweten Wiehnachtsdag glieks twee, wo Ji hengahn köönt: Klock teihn gifft dat een plattdüütschen Gottsdeens mit Pastersch Carina Lohse in’e Flottbeker Kark in Groot Flottbek – dor warrt ok en Familienorchester spelen – un denn gifft noch en annern Plattdüütschen Gottsdeenst Klock söss an’n Avend in’t Gemeendehuus vun’e Krüüzkark in Wandsbeek. Dor is ok Gerd Spiekermann mi bi, de över Öllern un Kinner, över dat veerte Gebott un dat Glieknis vun den verloren Söhn snacken warrt.
Moderatschoon: Jan Wulf
Schlagwörter zu diesem Artikel
Plattdeutsch
