Wi snackt platt
Sonntag, 20. November 2022, 08:30 bis
09:00 Uhr
Wat Plattdüütsch angeiht, dor kummt een an den Naam Hartmut Cyriacks nich an vörbi. As Plattsnacker stünn he ümmer ganz vöörn mit an un hett sik bannig dull för uns Spraak insett un sik dor ok üm kümmert. Un düsse Daag nu hett dat mit Mal ganz unvermodens heten, dat Hartmut Cyriacks storven is.
1955 is he in Achim in'n Landkreis Verden in Neddersassen to Welt kamen, hett Germanistik un Geschichte studeert un güng denn na sien Tiet as Referendar na't Ohnsorg-Theater hen, wo he meist teihn Johr lang as Dramaturg arbeidt hett. Dorna hett he sik mit Peter Nissen tohoop ganz besünners üm uns plattdüütsche Spraak kümmert un is ok ne Tiet lang hier bi uns in'e plattdüütschen Narichten bi NDR 90,3 to hören ween. Gerd Spiekermann besinnt sik för uns Sünndag in "Wi snackt Platt" noch mal op Hartmut Cyriacks, de düsse Week in't Öller vun 67 Johr vun uns gahn is.
En Avend in'e Oper
Wilhelm Wieben is ok Plattsnacker ween. Wenn he vertellt hett, denn hebbt de Geschichten ümmer noch en ganz egen Klang kregen, hett dat mal heten. Un dat stimmt. Dor köönt Ji Jo an'n Sünndagmorgen bi NDR 90,3 "Wi snackt Platt" sülvst ok noch mal vun övertügen, denn dor höört Ji Wilhelm Wieben noch mal mit en Geschicht över en seggt wi mal ganz interessanten Avend in'e Oper.
De düstern Daag
Bavento höört Ji Sünndag bi "Wi snackt Platt" denn ok noch mal wat vun Reimer Bull, wo he 'n beten wat över de düstern Daag vertellen deit, de wi nu in'n Novembermaand, in de düstern Johrstiet, faat hebbt: Volkstruerdag, Buß- un Beetdag un nu an'n Sünndag Dodensünndag.
De Leder in uns Sennen:
Godewind - Kumm mit an't Meer
Otto Groote Ensemble - Min Jehann
Rüdiger Wolff - Wind weiht över uns Land
Ina Müller - Buten Kluten
Gerrit Hoss - In disse Tied
Moderatschoon: Jürgen Fitschen
Schlagwörter zu diesem Artikel
Plattdeutsch
