Wi snackt platt
Sonntag, 09. Oktober 2022, 08:30 bis
09:00 Uhr
Bi "Wi snackt Platt" geiht dat dütmal blangen anner Saken üm dat Ohnsorg Theater. 120 Johr is dat düsse Daag her, dat dat Theater gründt worrn is. Wi vertellt Jo, woans dat dorto keem. Denn sünd wi ok noch bi Helmut Hamke in’t Töverhuus in de Neegde vun Elmshorn to Besöök, un dat geiht üm en Drapen vun 35 Lüüd op Finkwarder tokamen Wekenenn. Lüüd ut Österriek, de Swiez un Düütschland snackt dor över dat Thema Dialekten un Mundoorten.
120 Johr Ohnsorg-Theater
Dat Ohnsorg-Theater warrt düsse Daag 120 Johr oolt – un dat dat de nedderdüütsche Bühn överhaupt gifft, dat geiht op een ganz besünnern Mann torüch: Dr. Richard Ohnsorg. An’n 12 Oktober 1902 hett he, de egens Bibliothekar weer, mit een poor Frünnen de „Dramatische Gesellschaft“ gründt. Tooerst hebbt se sik dor blots Stücken op Hoochdüütsch vörnahmen un eenanner vörleest, man al to düsse Tiet hett Richard Ohnsorg na moderne plattdüütsche Schrievers söcht – un is fünnig worrn: to’n Bispeel bi Fritz Stavenhagen, Gorch Fock un Hermann Bostorff. Ohnsorg un siene Frünnen hebbt Stücken vun düsse Schrieverslüüd denn ok op de Bühn bröcht: in‘t Thalia Theater un anner Hüüs in Hamborg, man ok in Altona, Elmshorn oder Kiel hebbt se speelt.1920 is denn ut de "Dramatische Gesellschaft" de Nedderdüütsche Bühn Hamborg worrn. As denn dat Radio keem un de Nedderdüütsche Funkbühn bi de NORAG, dor weern denn ok Richard Ohnsorg un siene Schauspelerkollegen mit dorbi. Blots een Opnahm gifft dat vundaag noch vun Richard Ohnsorg. 1932 weer he bi dat Hörspeel „Reincke de Voss“ dorbi. Speelt hett he de Rull vun Grimmbart, den Dass. 1936 kreeg Richard Ohnsorg sien egen Theater hier bi uns in’e Stadt. An‘e Große Bleichen weer dat. 1946 hett dat lütte Theater an’e Große Bleichen denn een ne’en Naam kregen: Ohnsorg-Theater. Richard Ohnsorg, de weer to düsse Tiet blots noch Ehrenintendant un harr nix mehr to seggen, wieldat he na de Nazittiet nich as unbelast gellen dä. Een lütt beten later is Richard Ohnsorg 1947 denn kort vör sien söventigsten Geboortsdag storven. Op sienen Grafsteen op den Ohlsdörper Friedhoff steiht bet hüüt: „Hollt fast! Hollt fast! Denn geiht dat klor, denn lewt uns Sprok noch dusend Johr!“
Dialekt- un Mundoort-Daag op Finkwarder
Dat is een ganz besünnert Drapen, dat dor tokamen Wekenenn vun 14. bet 16. Oktober op Finkwarder op den Plan steiht. Denn vun Fredag af an bet Sünndag dreiht sik dor allens üm dat Thema düütsche Dialekten un Mundoorden. Üm un bi 35 Lüüd draapt sik un tuuscht sik ut. „Tagung des Internationalen Dialektinstituts IDI“ heet dat Gaanze – un een Mann, de dat ganze mit op’e Been stellen deit, dat is Gerd Spiekermann. Bi "Wi snackt Platt" vertellt Gerd Spiekermann vun dat Internationale Dialektinstitut IDI, vun dat Programm bi Dialektdaag un vun de Veranstalten an Sünnavendavend: een Lesen, wo meist 25 ünnerscheedlich Dialekten vörstellt warrt.
Henwies: De Lesung "An der Vogelfluglinie - Was hast Du verstanden/Hast Du was verstanden?" is an'n Sünnavend, den 15. Oktober, avends Klock 8 in't RILANO-Hotel, Hein-Sass-Weg 8, op Finkwarder. Kössen deit dat nix.
Helmut Hamke un dat Töverhuus
In Klein-Nordende bi Elmshorn – nich wiet weg vun Hamborg – dor gifft dat siet vele, vele Johrn een echte Institutschoon för regionale und plattdüütsche Kultur: Dat Töverhuus! Helmut Hamke, so heet de Mann, de dor achter stickt un sik tohoop mit sien Fro üm allens kümmern deit – siet 25 Johr. Man nu, hett he seggt, schall dormit Sluss ween. He will sik to Roh setten. Dat Töverhuus aver, dat schall wieder leven: dör een ne’en Kulturvereen. Helge Albrecht, de hett Helmut Hamke drapen, mit em över de Geschicht vun dat Huus snackt un sik dat Töverhuus mal nipp un nau vun binnen bekeken.
Moderatschoon: Jan Wulf
De Leder in uns Sennen:
- Cool bliem - Godewind
- Fresenhoff - Santiano
- Ik al alleen - Knipp Gumbo
- In disse Tiet - Gerrit Hoss
- Hamborg - Norma