Wi snackt platt

Dat Hörrohr, Gorch-Fock-Huus un Charmonia

Sonntag, 28. August 2022, 08:30 bis 09:00 Uhr

Eine Neuauflage des Ohnsorg-Klassikers "Dat Hörrohr" feiert am 28. August im Ohnsorg Theater Premiere. © Sinje Hasheider Foto: Sinje Hasheider
Bi de Neeoplaag vun den Ohnsorg-Klassiker "Dat Hörrohr" is Wolfgang Sommer in de Hauptrull as Opa Meiners to beleven. Wi hebbt mit de Schauspelers vun dat Stück un ok mit den Regisseur Frank Grupe snackt.

Dat Stück "Dat Hörrohr" vun Karl Bunje höört mit to de ganz groten Ohnsorg-Klassikers. Nu is dat Stück wedder op de Bühn an'n Heidi-Kabel-Platz to beleven: vun den 28. August bet to'n 4. Oktober. Bi "Wi snackt Platt" vertellt wi Jo, op wat Ji Jo bi dat Stück freien köönt, un wi snackt mit de Schauspelers un den Regisseur Frank Grupe. Denn sünd wi ok noch bi dat Gorch-Fock-Huus vun’e Heimatvereenigen Finkwarder to Besöök un dat geiht üm den Bühnenafscheed vun de plattdüütsche A capella-Grupp “Charmonia”.

Ohnsorg-Nostalgie mit "Dat Hörrohr"

To'n Anfang vun de ne'e Speeltiet steiht bi dat Ohnsorg Theater en echten Ohnsorg-Klassiker op't Programm: "Dat Hörrohr". Dat Stück, dat de Autor Karl Bunje in de föfftiger Johrn schreven hett, höört hüüt woll blangen "Tratsch op de Trepp/Tratsch im Treppenhaus" to de bekannsten Ohnsorg-Stücken överhaupt. De Hauptrull as "Opa Meiners" warrt dütmal de Schauspeler Wolfgang Sommer spelen. Beate Kiupel is as sien Swiegerdochter Bertha to beleven. Man ok sünst kann sik dat Publikum op masse wunnerbare Schauspelers freien: Robert Eder steiht as Bertha ehr Mann Jochen ("As Du meenst, Bertha!") op'e Bühn, de Enkelin Elke warrt vun Ohnsorg-Ensemble-Neetogang Nele Larsen speelt un bavento sünd ok noch Quintus Hummel as Knecht Bernd, Erkki Hopf un Birte Kretschmer as Landbreefdräger Tobias Quadfasel un sien Fro Lieschen, Christian R. Meyer as Notar un Oskar Ketelhut as Arnold Hogeback to beleven.

För "Wi snackt Platt" weern wi bi en Proov vun dat "Dat Hörrohr" mit dorbi un hebbt mit de Schauspelers un mit den Regisseur Frank Grupe snackt. Ok en lütten Utsnitt ut dat Stück hebbt wi för Jo: een Szene vun'n Anfang vun dat Stück, wo Bertha un ehr Mann Jochen allerhand versöken doot, den olen Opa Meiners, de in en Lehnstohl sitten deit un an't Snorken is, optowaken.

Weitere Informationen
Kapitän wirft ein Seil © picture-alliance/ dpa Foto: DB Andreas Tamme

To'n Abonneern: De "Wi snackt Platt"-Podcast

Wat an plattdüütsche Kultur op de Bühn, in de Literatur oder in Films löppt - Ji kriegt dat mit bi "Wi snackt Platt" vun NDR 90,3. mehr

Nee op Schick bröcht: Dat Gorch-Fock-Huus op Finkwarder

Das Elternhaus von Johann Wilhelm Kinau alias Gorch Fock am Finkenwerder Neßdeich © NDR Foto: Petra Volquardsen
Dat Gorch-Fock-Huus in'n Nessdiek Nr. 6 op Finkwarder.

Op Finkwarder, in de Straat Nessdiek Nummer 6, dor steiht dat Gorch-Fock-Huus. Lange Johrn hett hier in düt lütt Fischerhuus de Familie Kinau leevt, to de ja ok de Schrieversmann Gorch Fock (“Seefohrt is not”) alias Johann Kinau höört hett. Hüüttodaags, dor is dat Gorch-Fock-Huusok un vör allen een Museum. Op ganz besünner Art kann en dor wat vun dat Leven op Finkwarder in fröhere Tieden lehren un, kloor: dat geiht ok veel üm de Geschicht vun de Familie Kinau. Körtens eerst, dor hett de Heimatvereen Finkwarder, dat Gorch-Fock-Huus mal wedder so richtig nee op Schick bröcht. "Wi snackt Platt"-Reportersch Benita Brunnert, de weer annerletzt mal dor un hett sik allens wiesen laten un mit de Lüüd vun de Heimatvereenigen snackt.

Henwies: Wenn Ji Lust hebbt, Jo dat nee op Schick bröchte Gorch-Fock-Huus ok mal antokieken: as een Grupp vun minnstens fief Lüüd köönt Ji dor alltiets eenfach mal anropen un en Termin utmaken. För all de anner Lüüd staht de Dören vun’t Huus jümmers an’n eersten Sünndag in’n Maand apen - twüschen Klock twee un halvig söss.

Grote Fier: 100 Johr Heimatvereenigen Finkwarder

Een ganz besünner Möglichkeit, sik dat Gorch-Fock-Huus in Nessdiek Nr. 6 antokieken, is de 100 Johr-Jubiläums-Fier vun de Heimatvereenigen Finkwarder an'n 4. September. Vunaf Klock ölven geiht dat los mit Musik vun de Old Merry Tale Jazzband. Nameddags is ok noch de Band “De Plietboys” to beleven. Dorto gifft dat Wust vun’n Grill, Kaffee un Koken un allens, wat sünst noch to en schöne Fier dortohöört.

A Capella op Platt - "Charmonia" seggt tschüss!

Die A-cappella-Gruppe Charmonia mit Gründungsmitglied Dirk Krause (ganz rechts). © Charmonia Foto: Charmonia
Se weern mehr as dörtig Johr mit plattdüütsche A Capella-Musik ünnerwegens: de Grupp "Charmonia".

Bi "A Capella"-Musik, also Musik ganz ahn Instrumente, dor fallt en toeerst mal de Comedian Harmonists op Ingelsch un de Wise Guys op Hoochdüütsch in. Man ok op Plattdüütsch hett sik een Grupp en groten Naam maakt: "Charmonia”! Mehr as dörtig Johr sünd de fief, fröher söss Mannslüüd ünnerwegens ween, man nu is Sluss: denn an'n 21. August hett de Band ehrn Bühnenafscheed fiert. Woso se nu Sluss maakt un wat se allens in'e verleden dörtig Johr beleevt hebbt, doröver hett Gerrit Hoss mit em snackt.

Moderatschoon: Jan Wulf

De Leder in uns Sennen:

  • Marie Marie - Knipp Gumbo
  • Mank all mien Drömen - Iko Andrae
  • Sömmernacht - Jan Cornelius
  • Help - Charmonia
  • Op bald - Norma

Weitere Informationen
Menschen sitzen auf einer Aussichtsplattform oberhalb der Hamburger Landungsbrücken © www.mediaserver.hamburg.de Foto: Jörg Modrow

Wi snackt Platt bei NDR 90,3

Reportagen ut de Plattdüütsche Welt, Geschichten, Klöönsnacks un plattdüütsche Musik - jeden Sünndag Klock 8.30 un in'n Podcast. mehr

Schild mit der Aufschrift "Moin" © fotolia Foto: DOC RABE Media

Plattdeutsch bei NDR 90,3

Ob "Wi snackt Platt", "Hör mal´n beten to" oder unsere "Narichten op Platt": hier sind die plattdeutschen Angebote von NDR 90,3 auf einen Blick. mehr

Leute im Gespräch (Montage) © Fotolia.com Foto: Kevin Woodrow, drubig-photo

De Welt snackt Platt

In de plattdüütsche Welt vun NDR.de hebbt Se alle plattdüütschen Sennungen op een Blick. Hier gifft dat ook Norichten op Platt un een beten wat to de Geschicht vun de plattdüütsche Spraak. mehr

Schlagwörter zu diesem Artikel

Plattdeutsch

NDR Logo
Dieser Artikel wurde ausgedruckt unter der Adresse: https://www.ndr.de/903/epg/Wi-snackt-platt,sendung1274394.html
NDR 90,3 Livestream

ARD Hitnacht

00:00 - 05:00 Uhr
Live hörenTitelliste