Wi snackt platt
Sonntag, 21. August 2022, 08:30 bis
09:00 Uhr
Dütmal geiht dat bi "Wi snackt Platt" blangen anner Saken üm Wolf Baus un sien lütt Orchideen-Paradies in Hamborg-Bargsteed. Denn sünd wi ok noch in de Grone-Berufsfachschool för Ergotherapie to Besöök, un wi snackt mit Seelüüd-Diakon Jan Oltmanns. 36 Johr lang weer he de Baas vun’n Seemannsclub Duckdalben in’n Hamborger Hoben un nu is Sluss: he geiht in Rente.
Seelüüd-Diakon Jan Oltmanns seggt "Tschüß!"
De Seemanns-Club Duckdalben in Hamborg-Waltershof, dat is en ganz besünnern Oort: Seelüüd op Landgang, de findt dor, merrn in’n Hamborger Hoben, sowat as en tweetet Tohuus: se köönt dor Billard spelen, Schokolaad köpen, Karaoke singen oder blots eenfach mal in Roh mit de Familie in’e Heimat telefoneern. Ok Hölp kriegt de Seelüüd in’n Duckdalben: Hölp bi all de Probleme, de de Seefohrt so mit sik bringt: wenn dat Heimweh to groot is oder wenn se wegen Corona op jümehr Scheep fasthangt, de Lüüd vun’n Duckdalben sünd jümmers to Steed. Bi all de wunnerbaren Lüüd, de bi'n Duckdalben arbeiten doot, gifft dat een Mann, ahn den dat den Seemannsclub Duckdalben vun hüüt so nich geven wöör: Seelüüd-Diakon Jan Oltmanns. 1986 hett he, de in Oostfreesland to Welt kamen is, dormit anfungen, den Seemannsclub Duckdalben optoboen. Nu, na meist 36 Johrn geiht he as Baas vun'n Duckdalben in Rente. Wi hebbt mit Jan Oltmanns snackt.
Melanie Elvers un de Grone-Berufsfachschool för Ergotherapie
„Was Hänschen nicht lernt, lernt Hans nimmermehr“ - düssen dösigen Snack op Hoochdüütsch, den kennt Ji seker ok. Ganz schönen Tüünkraam is dat, denn: dortolehren dat kann un dat schall een en Leven lang. Bernhard Koch, de weer annerletz mal ünnerwegens un hett bi en School vörbikeken, wo ok Lüüd hengahn köönt, de al lang mit beide Been fast in'tn Leven staht: de Grone-Berufsfachschool. Drapen hett he dor Melanie Elvers. De kunn as Erziehersch in’n Kinnergoorn wegen ehr Gesundheit nich wiedermaken un weer toletzt in en Olenhuus för de so nöömte soziale Betreuung tostännig. Nu will se mit ehr 47 Johr nochmal so richtig dörstarten: se maakt en Utbillen as Ergothearpeutin.
Dat Orchideen-Paradies vun Wolf Baus in Bargsteed
Mank all de Blomen, de dat gifft, sünd se woll mit dat Schönste, wat de Natur sik utdacht hett: de Orchideen. Üm un bi 40.000 Arten vun Orchideen gifft dat, un wokeen mal een vun düsse Planten bi sik to Huus hatt hett, de weet: düsse Bloomen verlangt veel Pleeg un ok “Know How”. “Wi snackt Platt”-Reportersch Benita Brunnert weer annerletzt mal in Hamborg-Bargsteed ünnerwegens un se hett dor en Mann drapen, de sik so richtig goot utkennt mit düsse wunnerbare Planten. Un nich blots dat: he hett sik dor bi sik tohuus in Bargsteed ok sien egen lütt Orchideen-Paradies opboot.
"Plötzling" - dat Plattdüütsch Hörspeel an'n Middewekenavend
“Seker is Seker”, so heet een Hörspeelreeg, de sik de NDR tohoop mit Radio Bremen utdacht hett. Dat geiht dor üm de Versekerungsagentin Jacqueline Theeßen und wat de so allens in ehrn Job beleevt. Middewekenavend vunaf Klock 5 na negen, dor köönt Ji bi NDR 90,3 en ne’e Episood ut düsse Reeg höörn: “Plötzling” heet de Folg dütmal, un un bi "Wi snackt Platt" maakt Jo Ilka Brüggemann dor al mal en beten Lust op.
De Leder in uns Sennen:
Hamborg - Norma
In disse Tied - Gerrit Hoss
Uns geiht dat goot - Godewind
Wellen, Wind un Meer - Lars & Timpe
Dänz op de Deel - Yared und die Schlickrutscher
Moderatschoon: Jan Wulf
Schlagwörter zu diesem Artikel
Plattdeutsch
