Wi snackt platt
Sonntag, 14. August 2022, 08:30 bis
09:00 Uhr
Bi "Wi snackt Platt" wüllt wi dütmal glieks an twee plattdüütsche Dichterslüüd torüch denken: Irmgard Harder un Boy Lornsen. All beid sünd vör hunnert Johr op de Welt kamen: Boy Lornsen an’n 7. August in Keitum op Sylt un Irmgard Harder an’n 20. August hier bi uns in Hamborg. Gerd Spiekermann hett för Jo jümehr Paradestücken rutsöcht.
Kinnerbookautor un plattdüütschen Dichtersmann: Boy Lornsen
Wat hett de nich allens maakt in sien Leven: he füng an as Timmermann, nohst hett he as Steenmetz sien Geld verdeent un denn keem 1968 sien eerste Kinnerbook rut: "Robbi, Tobbi und das Fliewattüüt", dat em wiet un siet bekannt maken dee. Eerst in de 80er un 90er Johren hett he denn siene plattdüütschen Böker rutbröcht. Bi "Wi snackt Platt" höört Ji twee Riemels vun Boy Lornsen - vördragen vun Lornsen sülvst: eenmal en Utsnitt ut dat Book "Sien Schöpfung un wat achterno keem". Dorbinnen vertellt Lornsen dat Ole Testament, dat heet de Schöpfungsgeschicht, in plattüütsche Riemels. Un denn gifft dat bavento noch den Riemel "Dat Sinfuniekunzert" to höörn.
Henwies: Boy Lornsen sien "Schöpfungsgeschicht" just so as Boy Lornsen sien Text "Jesus vun Nazareth - Een Stremel Weltgeschicht" staht in dat Book "Vun Gott un Lüüd", dat in’n Quickborn-Verlag rutkamen is.
De plattdüütsche Grand-Dame vun'n NDR: Irmgard Harder
Op de Welt kamen is Irmgard Harder hier bi uns in Hamborg. Later harr ser lange Johren dat Leit vun de Plattdüütsche Redakschoon bi de Kollegen vun de NDR 1 Welle Nord in Kiel. Al 1954 hett Irmgard Harder mit dat Schrieven anfungen, 1956 weer se de eerste un lange Tiet ook eenzige Fro mank de "Hör-mal‘n-beten-to"-Schrievers. Een besünner Vergnögen weer dat, ehr vör Pubikum, also live to beleven – to'n Bispeel mit ehr Paradegeschicht över de "Handtasch an’n Avend".
Moderatschoon: Gerd Spiekermann
De Leder in uns Sennen:
Juli - Gerrit Hoss
Lüttje Glück - Die Tüdelband
Wi sünd da - BBeatz
Help - Charmonia
Leev kaam un bliev in mien Huus - Knipp Gumbo