Wi snackt platt
Sonntag, 07. August 2022, 08:30 bis
09:00 Uhr
Bi "Wi snackt Platt" geiht dat dütmal üm den Film “Mittagsstunde”. De Erfolgsroman vun Dörte Hansen kummt in'n September bunnswiet in de Kinos un wi, wi hebbt mit de Autorsch över den Film snackt. Denn maakt wi Jo ok noch Lust op en ne’et Theaterstück, dat vunaf vunaf den 11. August biTanks Theater in Noorderstedt to sehn is, wi kiekt bi den Goornvereen 424 Tarpenbeekufer vörbi, un wi sünd in’t Dörp Wacken in Sleswig-Holsteen to Besöök.
Tanks Theater speelt Ohnsorg-Klassiker "Snieder Nörig"
"Snieder Nörig", so heet en olen Ohnsorg-Klassiker vun Paul Schurek, den Ji villicht ok noch ut dat Fernsehn mit Kult-Schauspeler Henry Vahl in'e Hauptrull kennt. Nu hett sik Tanks Theater in Noorderstedt düssen Klassiker vörnahmen. De Premieer vun dat Stück is an'n 11. August. Speelt warrt in'n Festsaal an'n Falkenbarg in Noorderstedt. Benita Brunnert hett dor mal bi en Proov vörbikeken.
"Mittagsstunde" kümmt in de Kinos
De eerste Erfolgsroman vun Dörte Hansen, dat weer dat Book “Altes Land”. Dorut is al en Film maakt worrn. Man nu kümmt ok Hansen ehr tweten Roman “Mittagsstunde” in de Kinos - un dat mit Charly Hübner in de Hauptrull. An’n 12. September is de Kinopremieer in Husum un vunaf den 22. September is de Film denn ok bunnswiet to sehn. Rutkamen schall de Film in twee Verschonen: toeerst Mal heel op Hoochdüütsch, man in en twete Faten, dor sünd denn ok ganz vele plattdüütsche Dialogen mit binnen. Lornz Lorenzen, de hett de Autorsch Dörte Hansen drapen un mit ehr över den ne’en Film snackt.
100 Johr Goornvereen Tarpenbekufer
Jedeen, de dat grote Glück hett, een egen Goorn to hebben, de weet: dat is würklich en wunnerbare Saak! Man Hüüs un Wahnungen merrn in’e Stadt mit Goorn, de gifft dat gar nich so vele un bannig düür, dat sünd se faken ok. Wiel dat so is, denkt vele Lüüd hier bi uns in’e Stadt över en egen Schrebergoorn na. Bernhard Koch, de weer annerletz mal op Besöök in so een Schrebergoorn, un twors bi de Lüüd vun’n Goornvereen 424 Tarpenbekufer. 100 Johr warrt de Vereen överneegste Week oolt.
Wacken: Een ganzet Dörp in Heavy-Metal - Fever
Dat Heavy-Metal-Festival in dat lütt Dörp Wacken in Sleswig-Holsteen is dat gröttste Heavy-Metal-Festival vun'e Welt. Twee Johr lang hebbt se ok dor mit dat Festival Corona-Paus maken müsst. Man nu güng dat endlich wedder los. Gerrit Hoss, de weer mal in dat Dörp Wacken ünnerwegens un hett mit de Lüüd, de dor wahnen doot, över dat Festival snackt. Denn ok för Bewahners vun Wacken sünd düsse Festival-Daag heel wat Besünners.
Moderatschoon: Jan Wulf
De Leder in uns Sennen:
Deep in dien Hart - Janina
Marie Marie - Knipp Gumbo
Dörp reggae - Ina Müller
Mien Weg - Norma
These boys must be free - Yared & Floy feat. The Charchullas Nick
Schlagwörter zu diesem Artikel
Plattdeutsch
