Wi snackt platt
Sonntag, 03. Juli 2022, 08:30 bis
09:00 Uhr
Bi "Wi snackt Platt" sünd wi dütmal mit Fischer Stefan Meier op’e Ilv ünnerwegens, dat geiht mit Marianne Richter dör de Stadtdelen Harvestehuud un Rodenboom, un Ji höört de Geschicht, mit de Heiko Thomsen ut Eimsbüttel bi uns Schrievakschoon “Vertell doch mal” den tweten Platz maakt hett - vördragen vun Santiano-Sänger Axel Stosberg.
Mit Fischer Stefan Meier in'n Hamborger Hoben ünnerwegens
Vele Fischerslüüd, de gifft dat in'n Hamborger Hoben nich mehr, man Stefan Meier, de is dor mang de ganz groten Tankers un Krützfohrtscheep noch ünnerwegens - as een vun de letzten Fischer vun Finkwarder överhaupt. “Ilv” - so heet dat Schipp vun Stefan Meier - un Gerrit Hoss, de is bi em för "Wi snackt Platt" mal an Boord gahn.
Op’n Padd in Harvestehuud un Rodenboom
104 Stadtdelen hett Hamborg, un "Wi snackt Platt"-Reportersch Benita Brunnert, de will se all kennenlehrn un dor Plattsnackers drapen. Dütmal is se mit Marianne Richter in glieks twee Stadtdelen ünnerwegens: in Harvestehuud un in Rodenboom.
Henwies: Wenn Ji ok mal Lust hebbt, Benita Joon Stadtdeel to wiesen: wi söökt noch Plattsnackers to'n Bispeel in Tonndörp, Looksteed, Bahrenfeld oder ok in Langenbeek. Schrievt uns geern en Email an’n 903platt@ndr.de .
Plattsnacker vun Harten: Heiko Thomsen
Wat weer dat för en Överraschen: Nich blots Platz 1, sünnern ok Platz 2 vun uns Plattdüütsche Schrievakschoon “Vertell doch mal”, de güngen düt Johr na Hamborg. De Winner-Geschicht vun Wolfgang Krischke ut Eppendörp, de hebbt Ji al verleden Week bi “Wi snackt Platt” höört. Dütmal geiht dat üm den Mann, de op Platz 2 kamen is: Heiko Thomsen ut Eimsbüddel. Schoolmeester is Thomsen vun Beroop, man ok in de plattdüütsche Welt is he keen Unbekannten: he is een vun de Redakteuren vun de Zeitschrift Quickborn vun de Quickborn-Vereenigen, un he is in’n Vörstand vun’e Klaus-Groth-Sellschopp in Heid. Plattdüütsch is för em een Hartenssaak. Man to de Spraak kamen is he eerst laat. Mit üm un bi 50 Johr hett he anfungen, sik för norddüütsche Literatur to interesseern. Un wiel dor keen Weg an de Plattdüütsche Spraak vörbi geiht, hett he denn een Plattdüütsch-Kurs an'e Volkshoochschool maakt un is denn över dat Lesen vun Plattdüütsche Texten ok to dat Schrieven kamen. "Wi mööt hier rut" - so heet de Geschicht, mit de Heiko Thomsen düt Johr Platz 2 bi "Vertell doch mal" maakt hett. Geiht dor üm dat Thema Corona-Oplagen, man mal ut een gaanz anner Sicht. In't Ohnsorg-Theater vördragen hett de Kortgeschicht Santiano-Sänger Axel Stosberg.
Moderatschoon: Jan Wulf
De Leder in uns Sennen:
Lüttje Glück - Die Tüdelband
Sömmernacht - Jan Cornelius
Tweisamkeit in´t Wulkenkuckucksnest - Wolfgang & Anke
An't Enn vun'e Welt - Santiano
An Land - Annie Heger
Schlagwörter zu diesem Artikel
Plattdeutsch
