Wi snackt platt
Sonntag, 26. Juni 2022, 08:30 bis
09:00 Uhr
Bi "Wi snackt Platt" kiekt wi nochmal op „Vertell doch mal“, de grote plattdüütsche Schrievakschoon, de de NDR düt Johr nu to‘n 34. Mal tohoop mit Radio Bremen un dat Ohnsorg-Theater op’e Been stellt hett. Botschafter vun den Wettbewerb weer de Band Santiano. Un bi een grote Gala in't Ohnsorg-Theater sünd nu de besten Geschichten uttekent worrn. Dorbi güngen de eersten twee Priesen an twee Hamborgers: Wolfgang Krischke ut Eppendörp un Heiko Thomsen ut Eimsbüddel. Wi weern dorbi as se jümehr Priesen kregen hebbt un, kloor, gifft dat bi "Wi snackt Platt" ok de Winnergeschicht to höörn.
Un de Winner is: Wolfgang Krischke ut Eppendörp
De eerste Pries güng an Wolfgang Krischke mit sien Geschicht vun'n "Doden Winkel". In sien Vertellen geiht dat üm een Mann, bi den de Dood op eenmal in'e Stuuv sitten deit. Een wunnerbar lustige, man ok nadenkliche Geschicht mit veel swatten Humor.
Twete Pries an Heiko Thomsen ut Eimsbüddel
"Wi mööt hier rut" - so heet de Geschicht vun Heiko Thomsen ut Eimsbüddel, mit de he den tweten Pries wunnen hett. In sien Geschicht kummt an‘n Enn bi rut, dat dat dor gor nich üm Minschen gahn deit, vun de he dor vertellen deit, sünnern dat geiht üm Viren, de in sien Geschicht över all de Corona-Oplagen klagen doot.
Vertell doch mal: üm un bi 1300 Geschichten to't Thema "Op dat Leven"
Üm un bi 1.300 plattdüütsche Geschichten sünd bi de plattdüütsche Schrievakschoon "Vertell doch mal " in 't Johr 2022 tohoopkamen. De Jury harr also ornlich wat to doon un’n ganzen Barg vull to lesen. Un in all de Geschichten, dor güng dat op de een oder anner Oort un Wies ümmer üm dat Leven. Denn dat Thema düt Johr bi „Vertell doch mal", dat stünn ünner dat Motto: „Op dat Leven“. Un so heet nu an’n Enn denn ok dat Book, wat dat to uns plattdüütsche Schrievakschoon geven deit. De 26 besten Geschichten kann een dor nochmal binnen nalesen.
Moderatschoon. Jürgen Fitschen
De Leder in uns Sennen:
Mit Zampel un Kaffetäng - Willem
De Klock is Dree - Ina Müller
These boys mus be free (op Platt) - Nick, Yared & Floy feat. The Charchullas
Rollin'Home - Lui & Fiete