Wi snackt platt

Miniaturwunnerland, De lütte Prinz un Frollein Wunner

Sonntag, 01. Mai 2022, 08:30 bis 09:00 Uhr

Das Stück "Dat Frollein Wunner" feiert am 1. Mai 2022 Premiere im Ohnsorg-Theater in Hamburg. © Sinje Hasheider Foto: Sinje Hasheider
Vunaf den 1. Mai to sehn bi Ohnsorgs "Dat Frollein Wunner". Ok mit dorbi (v.l.n.r.): Tanja Bahmani, Nele Larsen un Caroline Kiesewetter.

De Wonnemaand Mai - nu is he dor - un mit em de Spargel! Wi weern op en Spargelhoff to Besöök un hebbt mal mit een Spargel-Buurn över de Oorn düt Johr snackt. Dorto kiekt wi ok noch in’t Miniaturwunnerland in’e Spiekerstadt vörbi, wi stellt Jo en ne’e Överesetten vun den “Lütten Prinzen” op Hamborger Platt vör,  un dat geiht üm dat Ohnsorg-Theater: an'n 1. Mai is dor Premieer vun dat Stück “Dat Frollein Wunner” un bavento hett de Bühn an’n Heidi Kabel-Platz ok noch verleden Middeweken künnig maakt, wat Ji dor in’e neegste Speeltiet op’e Bühn beleven köönt.

Mit Plattsnacker Hauke Schmidtke dör't Miniaturwunnerland

Das Stück "Dat Frollein Wunner" feiert am 1. Mai 2022 Premiere im Ohnsorg-Theater in Hamburg. © Sinje Hasheider Foto: Sinje Hasheider
AUDIO: Miniaturwunnerland, De lütte Prinz un Frollein Wunner (30 Min)
Hauke Schmidtke ist Gästeführer im Miniaturwunderland. © Bernhard Koch Foto: Bernhard Koch
Hauke Schmidtke is Gästeföhrer in't Miniaturwunnerland. In'e Tokunft warrt dat dor op Wunsch ok Törns op Platt geven.

Dat Miniaturwunnerland in’e Spiekerstadt, dat is woll een vun de populärsten Touristen-Attrakschonen hier bi in uns in’e Stadt. Wokeen dat Miniaturwunnerland besöken deit, de hett de Wahl: se oder he kann dor för sik alleen dörwannern un allens bewunnern - oder: se oder he kann en Törn mit en Gästeförer maken, de ok noch dat een oder anner interessante Detail verklaren deit. Een vun düsse Gästeföhrers, dat is Hauke Schmidke, un Bernhard Koch, de weer mit em annerletzt mal ünnerwegens.

Henwies: Wokeen mit Hauke Schmidtke ok mal en Plattdüütschen Törn dör dat Miniaturwunnerland maken will, de kann geern en Mail mit den Betreff "Tour op Platt" an fuehrungen@miniatur-wunderland.de schrieven. De Lüüd vun dor warrt sik denn bi Jo mellen.

"De lütte Prinz" op Hamborger Platt

Een Pilot mutt merrn in de Sahara nootlannen un dröppt op en lütten Jung. De Jung vertellt em, dat he vun en lierlütten Planeten kümmt, wo dat blangen anner Saken ok en Roos gifft, de he bannig leev hett.  Vele vun Jo weet wiss nu al, üm wat dat geiht: üm de Geschicht “De lütte Prinz” vun den Schrieversmann Antoine de Saint-Exupéry. Dat Book, dat he 1943 schreven hett, is een vun de erfolgrieksten Böker in’e ganze Welt. Üm un bi 145 Millionen Böker sünd dorvun bet nu verköfft worrn un dat in vele ünnerscheedlich Spraken. Nu kümmt  noch en Spraak mit bavento, denn de Edition Tintenfass, de hett de Geschicht nu ok in Hamborger Platt rutbröcht. Benita Brunnert, de weer bi Wolfgang Binder to Besöök. Dat is den Mann, de dat Book översett hett.

Henwies: Dat Book “De lütte Prinz" op Hamborger Platt is rutkamen in en lierlütte Oplaag. Fiefhunnert Stück gifft dat dorvun. Köpen köönt Ji dat Book för 19 Euro direktemang bi de Edition Tintenfass.

Ohnsorg: "Tosamen" in'e ne'e Speeltiet

Ein älterer Mann hält ein Hörrohr an sein Ohr, neben ihm sitzt eine Frau. © NDR/Maike Kollenrott Foto: Maike Kollenrott
Dat Stück "Dat Hörrohr" vun Karl Bunje is woll een vun de bekannsten Ohnsorg-Stücken öberhaupt. Ok Jens Scheiblich und Heidi Mahler weern in düt Stück mal to sehn.

Verleden Middeweken weer dat sowiet, denn dor hett dat Ohnsorg-Theater künnig maakt, wat dat dor in’e neegste Speeltiet to beleven gifft.To’n Deel würklich lustig togahn warrt dat dor, denn op’t Programm steiht ok een echten Ohnsorg-Klassiker, den vele vun Jo wiss noch ut dat Fernsehn kennt: “Dat Hörrohr!”. 1960 weer dat Stück dat eerste Mal bi Ohnsorgs to sehn. Damals weer Otto Lüthje in de Rull vun den olen Opa Meiners to beleven - en olen Kerl, de nich mehr so recht höörn kann un jümmers mit sien Hörrohr togang is, dat he de anner Lüüd verstaht. Vunaf August is nu de Schauspeler Wolfgang Sommer in düsse Rull an’t Ohnsorg to sehn un den Snack “As Du meenst Bertha”, den mutt sik denn Beate Kiupel anhöörn. De speelt sien Swiegerdochter.

Dr. Dörte Hansen © Sven Jaax Foto: Sven Jaax
In'e neegste Speeltiet in't Ohnsorg-Studio, de lütte Bühn vun't Theater, to beleven: Dat Stück "Altes Land" vun Dörte Hansen.

Man ok sünst is so mennig wat to beleven bi Ohnsorgs in’e tokamen Speeltiet, de ünner dat Motto "Tosamen" steiht. En Klassiker, de ok nochmal  wedder kümmt, is “En Mann mit Charakter” mit Heidi Mahler in’e Hauptrull, denn is ok noch “Dat Füerschipp” to beleven, een Stück na den Roman “Das Feuerschiff” vun Siegfried Lenz oder ok dat Stück “De Leven Öllern” - “Chers Parent” heet dat in’t Originaal -  en swatte Kummedie ut Frankriek. Besünners interessant un ok noordisch warrt dat denn ok in’t Ohnsorg Studio. De lütte Bühn vun dat Theater warrt teihn Johr oolt un fiert warrt dat ünner annern mit en Theaterfaten vun dat Bestseller-Book “Altes Land’ vun Dörte Hansen. Gifft also allerhand to beleven bi Ohnsorgs in’e neegste Speeltiet - kiekt Jo dat villicht mal nipp un nau op’e Internetsiet vun’t Theater an. 

Premieer bi Ohnsorgs: "Dat Frollein Wunner"

An'n 1. Mai is nu aver eerstmal Premieer vun dat Stück "Dat Frollein Wunner" - Kummedie mit gaanz veel Musik ut de 40er/50er Johrn, Danz un schöne Kostüme.Schreven hett dat Stück de böverste Speelleiter vun'tOhnsorg-Theater Murat Yeginer, un de föhrt ok Regie. Ankieken köönt Ji Jo dat Stück noch bet to’n 11.Juni!

To Besöök bi'n Spargelbuern in Aukrug

Mit Hollondaise, in'n Salat oder eenfach as Supp vörwech. Nu is se endlich wedder dor, de Saison för düütschen Spargel, un kloor: de fangt mit de Oorn an. Gerrit Hoss weer mit Spargelbuer Johannes Holm op'n Acker in Aukrug in Sleswig-Holsteen ünnerwegens un hett al mal ünner de Folien keken.

Moderatschoon: Jan Wulf

De Musik in uns Sennen:

  • Gröön saltig groden - Iko Andrae
  • Lüttje Glück - Tüdelband
  • Born, wo de Wind herkümmt - Charly Beutin
  • Mien Weg - Norma
  • Hamborg, mien Hoben - Meike Schrader & Wiebke Colmorgen

Schlagwörter zu diesem Artikel

Plattdeutsch

NDR Logo
Dieser Artikel wurde ausgedruckt unter der Adresse: https://www.ndr.de/903/epg/Wi-snackt-platt,sendung1259178.html
NDR 90,3 Livestream

Hamburg am Nachmittag

15:00 - 19:00 Uhr
Live hörenTitelliste