Wi snackt platt
Sonntag, 19. Juni 2022, 08:30 bis
09:00 Uhr
Bi "Wi snackt Platt" maakt wi Jo dütmal Lust op uns Vertell doch mal-Gala in't Ohnsorg, dat geiht üm een Krimi op Platt un wi denkt an NDR-PlattEwald Christophers torüch, de düsse Daag 100 Johr oolt worrn weer.
"Vertell doch mal"-Gala in't Ohnsorg-Theater - ok online!
Nich mehr lang töven un denn geiht dat los: An'n Sünndag, den 19. Juni, vörmiddags Klock ölven is uns grote "Vertell doch mal"-Gala in't Ohnsorg-Theater - un Ji, Ji köönt dorbi ween: ok vun tohuus ut! Denn de Gala mit all de Geschichten un de Musik gifft dat ok live in’t Internet to beleven ünner ndr.de/vertell. Freit Jo op Axel Stosberg un Timsen vun’e Band Santiano, op de Hamborger Sängersch Norma un toallereerst op wunnerbare plattdüütsche Kortgeschichten, vördragen vun Ohnsorg-Schauspelers. Modereert warrt de Matinée vun NDR-Redakteursch Ilka Brüggemann.
Söss Geschichten ut Hamborg gaht in't Rennen üm de Priesen
“Op dat Leven” - dat weer dat Thema vun uns plattdüütsche Schriefakschoon “Vertell doch mal” düt Johr. Wunnerbare 1300 Kortgeschichten hebbt Ji, uns Tohörers, uns toschickt - un dorut - un dat weer gar nich so licht - hett denn een Vörjury de 25 besten Geschichten rutsöcht. De sünd nu in’t Rennen för de fief Priesen, de dat för wussen Lüüd to winnen gifft. Un soveel köönt wi Jo al vertellen: ünner düsse 25 Geschichten sünd ok 6 Geschichten ut Hamborg mit dorbi. Wi drückt de Dumens!
Ronja Sievertsen: Winnersch vun den Ü-18 Pries
“Vertell doch mal”, dat is nich blots een Schrievakschoon för wussen Lüüd, ok de Nawuss is opropen Kortgeschichten to schrieven. Bekannt geven warrt de Winner vun den Ü-18-Pries jümmers al een poor Daag vör de grote Winner-Gala in't Ohnsorg - un de junge Fro, an de de Pries dütmal geiht, kümmt ut Viöl in’n Kreis Noordfreesland, also ut Sleswig-Hoolsteen. Ronja Sievertsen heet de Winnersch düt Johr un bi "Wi snackt Platt" stellt Jo Lina Bande de junge Abiturientin vör, de ok bi de Jugendfüerwehr aktiv is.
"Grulich Fund" - Krimi op Platt vun Jörg Rönnau
Egens weer Jörg Rönnau Krankenpleger. Man wiel dat en heel un deel anstrengenden Beroop is, harr he jichtenswann Maleschen mit sien Rüch un muss sien Job an’n Nagel hangen un in Rent gahn. En ne’e Opgaav muss her. Un wat maakt so en pensioneerten Krankenpleger? He fangt an, en Krimi to schrieven! Un nich blots een: fief Krimis sünd bet nu rutkamen, veer dorvun op Hoochdüütsch un een dorvun nu ok op Platt. “Grulich Fund” heet de Krimi - un Benita Brunnert, de hett dor mal rinkeken un mit den Autoren snackt.
Henwies: "Grulich Fund" is rutkamen in'n Quickborn Verlag. Dat Book hett 126 Sieden und kössen deit dat 9,10 Euro.
"Platt is mien Moderspraak" - To'n Gedenken an Ewald Christophers
"Platt is mien Moderspraak. De kummt vun Hart un geiht na’t Hart.", dat weer Ewald Christopher sien Levensmotto. Siet Anfang vun’e föfftiger Johrn weer he de Stimm ut Oostfreesland bi’n Noorddüütschen Rundfunk. As Reporter op Hooch un Platt weer he ünnerwegens, un ok bi’t Fernsehn weer he to sehn - meist twinnig Johr lang. Siene Sennen “Klönsnack” un “Talk op Platt” sünd unvergeten, man de NDR-Höörfunk-Reeg “Hör mal beten to” leeg Ewald Christophers besünners an’t Hart. Üm un bi 2000 Geschichten hett he dorför schreven. Bi "Wi snackt Platt" denkt wi torüch an Ewald Christophers, de an 19. Juni 100 Johr oolt worrn weer, un, kloor, dat gifft ok en Geschicht vun em to höörn.
Moderatschoon: Jan Wulf
De Leder in uns Sennen:
Born, wo de Wind herkümmt - Charly Beutin & Die Schreckschuss-Band
Ik all alleen - Knipp Gumbo
Petticoat un Popcorn - Godewind
Ganz goot - Norma
Hüüt is mien Dag - Timsen un sien Lüüd
Schlagwörter zu diesem Artikel
Plattdeutsch
