Wi snackt platt
Sonntag, 12. Juni 2022, 08:30 bis
09:00 Uhr
Bi "Wi snackt Platt" sünd wi düsse Week bi de Modelliesenbahnfrünnen Hamborg-Walddörfer in Bardörp to Besöök, wi sünd bi en Eerste Hölp-Kurs op Platt dorbi un dat geiht üm den Förderkreis vun den Olhlsdörper-Friedhoff.
De Modelliesenbahn-Frünnen Hamborg-Walddörfer in Bardörp
“Bergedorf Süd” so heet een olen Bahnhoff in Hamborg-Bardörp. Egens is dor nix mehr los: 1953 is dor de letzte Personentog affohrt. Blots denn un wenn kümmt noch en Museums-Iesenbahn ut Geesthacht vörbi. Man wenn een gaanz nipp un nau hinkieken deit, denn sünd dor ok noch düsse dree Iesenbahn-Waggons, de dor gaanz ahn Lokomotiv op de Schienen staht. Ok Lüüd stiegt dor jümmers mal wedder in oder kaamt rut. Wat dat dormit op sik hett, dat hett uns “Wi snackt Platt”-Reporter Bernhard Koch för uns mal rutforscht. He weer bi de Modelliesenbahn-Frünnen Hamborg-Walddörfer to Besöök, de jümmers an'n Diengsdagavend jümehrn Vereensavend hebbt.
Een Hart för schmucke Graffsteden - De Förderkreis Ohlsdörper Friedhoff
Nu, wo dat op den Sommer togeiht, dor gaht ja vele Lüüd ok geern mal rut in de gröne Natur. Un de gifft dat ok merrn bi uns in’e Stadt to beleven: to’n Bispeel op den gröttsten Parkfriedhoff vun de Welt, op den Ohlsdörper Friedhoff. Masse Bööm, Blomen, Dieken un Beken gifft dat dor to bekieken - un, kloor, ok Graffsteden vun Lüüd as Jan Fedder, Helmuth Schmidt und Hein Köllisch. Dat ok de olen, besünners schmucken Graffsteden erhollen blievt, dorför sett sik de Förderkreis Ohlsdörper Friedhoff in. "Wi snackt Platt"-Reportersch Benita Brunnert hett mal mit de Lüüd vun denFörderkreis snackt
Eerste Hölp op Platt in Sarlhusen in'n Kreis Steenborg
Mal Hand op’t Hart: wannehr hebbt Ji dat letzte Mal en Erste Hölp - Kurs maakt? Vele vun Jo warrt nu seker seggen: "Oh dat is lang her! Villicht teihn, twinnig, dörtig oder ok veertig Johr?". Dorbi weet wi all, dat dat so wichtig is, dat een Bescheed weet in düsse Ogenblicke, wo dat üm Leven un Doot geiht. In een lütt Dörp in Sleswig-Holsteen, in Sarlhusen in’n Kreis Steinburg, dor beed se nu ok Eerste Hölp Kursen op Plattdüütsch an. Un Peter Bartelt, de hett dor mal för Jo vörbikeken.
"Beige" oder "Beesch" - wat is dat denn för en Farv?
Wenn Ji jümmers mal wedder op’e Söök na gode plattdüütsche Veranstaltens sünd, denn lohnt seker ok mal de Blick, wat so vör de Dören vun uns Stadt passeren deit. Dat Töverhuus in Klein Nordende bi ELmshorn, dat is dorför een godet Bispeel. Denn dor gifft dat jümmers Mal wedder würklich schöne Saken to beleven. 25 Johr gifft dat dat Töverhuus nu. Düsse Week warrt dor ornlich Jubliäum fiert. Un an’n Dingsdagavend, den 14. Juni, avends Klock 8, is dor Matthias Stührwohldt mit siene Geschichten to beleven. As een lütte Kostproov hebbt wi Jo en vun siene wunnerbaren Geschichten rutsöcht, un de geiht torüch in de Tieden as Matthias Stührwohldt noch en Kind weer un bi Oma un Opa to Besöök weer. "Beige" heet de Geschicht.
Moderatschoon: Jan Wulf
De Leder in uns Sennen:
Marie Marie - Knipp Gumbo
Uns geiht dat good - Godewind
In disse Tiet - Gerrit Hoss
Straat nah Westen - Otto Groote Ensemble
Hamborg - Norma
Schlagwörter zu diesem Artikel
Plattdeutsch
