Wi snackt platt
Sonntag, 05. Juni 2022, 08:30 bis
09:00 Uhr
Bi "Wi snackt Platt" denkt dütmal wi an den grootardigen Hamborger Kabarettisten, Ledermaker un Satiriker Hans Scheibner torüch. An'n 23. Mai is he in't Öller vun 85 Johrn storven. Dorto geiht dat ok noch üm dat Book "Windland" vun Dieter Staacken, un wi vertellt Jo, op wat Ji Jo bi de grote "Vertell doch mal"-Gala an'n 19. Juni in'tn Ohnsorg-Theater freien köönt.
Hans Scheibner to'n Gedenken
He weer Satiriker, Ledermaker, Kabarettist - un en echten Hamborger Jung. In’t Fernsehn un op’e Bühn, dor hett he de Böversten de Leviten leest. Un wat dat angeiht, dor hett he vele Johrteihnten lang mit to de Topp-Lüüd bi uns in’e Stadt höört. Al in’e School, dor hett Scheibner lütte Stücken schreven un düsse denn sien Klassenkameradens vörspeelt. Un as he denn as Koopmann in’e Lehr güng, dor stünn he denn op’e Bühn vun dat Hamborger „Theater 53“ - ünner annern mit Uwe Friedrichsen tohoop. Op lütte Bühnen, dor maakt Hans Scheibner sik Anfang vun’e 70er Johrn en Naam. Un ok mit dat Ledertexten is he domals fix dorbi: nich blots de Wöör to dat Onkel-Pö-Leed "Hamburg 75" sünd vun em, sünnern ok de Text vun den Schlager "Schmidtchen Schleicher". Beten wat later weer he denn ok in`t Fernsehn to beleven: bi de Sennen "Scheibnerweise" oder in sien Reeg "Bruno, die Nervensäge" in't NDR Fernsehn. Nu is Hans Scheibner in’t Öller vun 85 Johr storven. Bi "Wi snackt Platt" denkt wi an em torüch, un en plattdüütsche Geschicht vun em gifft dat ok noch to höörn.
"Windland" - ne'et Book
Dat gifft Saken, de höört to Noorddüütschland eenfach dorto: dat is dat Meer, dat sünd de Dieken, un dat is de Wind! Windstill, dat kennt wi hier baven an de Küsten meist jo gor nich. Tominnst so’n lichtet weihn höört jümmers dorto. Un wiel dat dat hier in’n Noorn ahn den Wind nich geiht, hett de Autor un Künstler Dieter Staacken ok sien ne’et Book dorna nööm: “Windland” heet dat - un he sülvst seggt: Düt Book is en platt-hoochdüütsche Wunnertüüt vull mit Texten un Biller. Dieter Staarcken, de is op’e Halvinsel Eiderstedt to Welt kamen, in Garding - dat is in de Neegde vun St. Peter Ording. Later hett he denn Kunst studeert un weer vele Johrn in Hamborg tohuus, ehr dat he denn wedder in sien Heimatdörp Garding torüchkehrt is. "Wi snackt Platt"-Reportersch Lina Bande hett Dieter Staacken op Eidersteed drapen un hett mit em över sien ne'et Book snackt.
Grote "Vertell doch mal"-Gala mit "Timsen" un Axel Stosberg vun'e Band Santiano
“Op dat Leven” - dat weer dat Thema vun uns Schrievaktschoon “Vertell doch mal” düt Johr. Üm un bi 1300 Lüüd hebbt uns jümehr Geschichten toschickt - un nu geiht dat üm de Wust! Denn an'n 19. Juni warrt de Priesen verdeelt - bi uns grote "Vertell doch mal"-Gala in't Ohnsorg-Theater. Botschafter vun uns Plattdüütsche Schrievakschoon, dat is düt Johr de Band Santiano - un twee vun'e Jungs, de warrt an'n 19. Juni ok mit dorbi ween: "Timsen" warrt en Leed singen un Axel Stosberg, de warrt en vun de wunnerbaren Siegergeschichten vördregen. Karten för de "Vertell doch mal"-Gala gifft dat in't Ohnsorg-Theater to köpen.
Moderatschoon: Jan Wulf
De Leder in uns Sennen:
Wellen, Wind un Meer - Lars & Timpe
Mank all mien Drömen - Iko Andrae
Mien Jehann - Ina Müller
An't Enn vun'e Welt - Santiano
Opstahn, wiedergahn - Norma
Schlagwörter zu diesem Artikel
Plattdeutsch
